ᖃᓄᐃᑉᐸᓚᐅᕐᓂᖏᓐᓂ

2012-ᒥ, ᓄᓇᕗᒻᒥ ᐃᒥᐊᓗᖕᒧᑦ ᒪᓕᒐᖓᑕ ᕿᒥᕐᕈᔭᐅᓂᖓᓂ ᐱᓕᕆᔨᐅᓂᐊᖅᑐᓂᒃ ᓴᖅᑭᑎᑦᑎᓚᐅᖅᐳᑦ ᓄᑖᒥᒃ ᑐᕌᒐᖃᕆᐊᖃᓕᕐᓂᕐᒥᑦ: ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᐅᓂᒃᑳᓕᐊᖑᔪᖅ ᐅᓂᒃᑳᕆᔪᒥᒃ ᐅᖓᓯᒃᑐᒨᖓᔪᒥᒃ ᐅᖃᖃᑎᖃᕐᓂᐅᔪᒥᒃ ᐱᓕᕆᔾᔪᓯᐅᔪᒥᒃ ᐃᓚᐅᑎᑦᑎᔪᒥᒃ ᑕᒪᒃᑭᓂᒃ ᓄᓇᕗᒻᒥ ᓄᓇᓕᐅᔪᓂᑦ. ᑐᕌᒐᓪᓗᐊᑕᐅᔪᖅ ᐅᓂᒃᑳᓕᐊᒥᒃ ᓴᓇᓂᕐᒧᑦ ᐊᑐᓕᖁᔭᐅᔪᓂᒃ ᐱᔾᔪᑎᖃᖅᑐᓄᑦ ᐃᒥᐊᓗᖕᒧᑦ ᒪᓕᒐᖓᓐᓄᑦ, ᐃᓚᖃᖅᖢᓂ ᐱᒻᒪᕆᐅᔪᓂ ᐊᑐᓕᖁᔭᐅᔪᓂᑦ ᒥᒃᖠᒋᐊᖅᑎᑦᑎᓂᕐᒧᑦ ᐃᒥᐊᓗᖕᒧᑦ−ᐱᔾᔪᑕᐅᔪᓄᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᓲᕐᓗ ᐃᓕᓐᓂᐊᖅᑎᑦᑎᓂᕐᒧᑦ ᐃᓄᓕᒫᓂᒃ ᑲᒪᒋᔭᖃᑦᑎᐊᕐᓂᐅᔪᒥᒃ ᐅᓗᕆᓇᙱᓐᓂᖅᓴᓂᒡᓘᓐᓃᑦ ᐃᒥᐊᓗᖕᒥ ᐊᑐᕐᓂᕐᒧᑦ.

ᐊᒥᓱᓂᒃ ᓯᓚᑖᒍᑦ ᐱᔾᔪᑎᑕᓕᒃ ᐃᒥᐊᓗᖕᒥ ᐊᑐᕐᓂᕐᒧᑦ ᐊᔾᔨᐅᙱᑎᑦᑎᔪᒥᒃ ᓄᓇᕗᒻᒥ ᑕᐅᑐᒃᖢᒍ ᑲᓇᑕᓕᒫᒥᒃ. ᑕᒪᒃᑯᐊ ᐃᓚᖏᑦ ᐃᓚᖃᖅᐳᑦ ᐊᔪᖅᓴᕐᓂᕐᒧᑦ, ᐊᓯᐅᔨᓂᖅ ᐃᓕᖅᑯᓯᖓᓐᓂ ᑭᓇᐅᓂᖓᓂ, ᐆᒪᓂᕐᓄᑦ ᖃᓄᐃᓕᖓᓂᐅᔪᓂᒃ, ᐃᓄᑭᑦᑑᓂᖓᓂ ᐅᖓᓯᖕᓂᐊᓗᖓᓄᑦ ᓄᓇᓕᐅᔪᓂᑦ, ᐃᖏᕐᕋᐃᓐᓇᖅᑐᓂ ᑕᐃᔅᓱᒪᓂᓂ ᐊᒻᒪ ᒫᓐᓇᐅᔪᒥ ᖃᓄᐃᓕᓂᕐᓘᑕᐅᓯᒪᓂᕆᔭᖏᓐᓂ, ᐊᒻᒪᓗ ᐱᓕᕆᔾᔪᓯᐅᔪᒥᒃ ᐊᑭᕋᖅᑐᕐᓂᕐᒥᑦ ᐊᒻᒪᓗ ᐃᓚᐃᓐᓇᖅᓯᓂᐅᔪᒥᑦ.

ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᓇᓗᓇᐃᖅᓯᓚᐅᖅᐳᑦ ᐃᓱᒫᓘᑎᓂᒃ ᓄᓇᓕᖕᒥᐅᑕᓂᒃ ᐃᒥᕐᔪᐊᓗᐊᖃᑦᑕᕐᓃᑦ ᐊᑐᖅᑕᐅᒐᔪᓕᕐᓂᖓᓂ ᐊᒥᓱᓗᐊᓄᑦ ᐃᓄᖕᓄᑦ ᓄᓇᕗᒻᒥ. ᓄᓇᕗᒻᒥᐅᑦ ᐅᓂᒃᑳᕆᓯᒪᕗᑦ ᐊᒥᓱᓂ ᐃᒥᐊᓗᓗᐊᖃᑦᑕᕐᓂᕐᓂ ᑕᐅᑐᒃᖢᒍ ᑲᓇᑕᓕᒫᒥᒃ, ᑐᕌᖅᓯᒪᓂᖃᖅᑐᒥ ᐃᓕᖅᑯᓯᐅᔪᒥᒃ “ᖁᑦᑎᒃᑐᒥ−ᐅᓗᕆᐊᓇᖅᑐᒦᓐᓂᖏᓐᓂ” ᐃᒥᐊᓗᖕᓂᕐᓂ, ᓲᕐᓗ ᐃᒥᕐᔪᐊᓗᐊᖃᑦᑕᕐᓂᖅ ᐊᒻᒪᓗ ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ, ᑕᐃᒪᐃᒐᔪᒃᐳᖅ ᐃᒥᐊᓗᖕᓂᕐᒥ ᐊᑐᖅᑕᐅᕙᖕᓂᐅᓪᓗᓂ. ᐅᖃᐅᓯᐅᓂᖓᑎᒍᑦ ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᑕᒪᓐᓇ ᐃᒥᐊᓗᓗᐊᖃᑦᑕᕐᓂᖅ ᐃᓕᖅᑯᓯᐅᔪᖅ ᐱᑎᑦᑎᓂᐅᒐᔪᒃᐳᖅ ᖃᔅᓯᒐᓚᖕᓂ ᐅᓄᕐᓂᐅᔪᓂᒃ ᐃᓄᑐᐃᓐᓇᓄᑦ, ᐃᓚᒌᓄᑦ ᐊᒻᒪᓗ ᐃᓅᖃᑎᒌᖕᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ. ᐊᖏᕐᕋᒥᒃ ᓂᙵᐅᑎᓂᖅ ᐱᓗᐊᖅᑐᒥᒃ ᐃᓱᒫᓘᑕᐅᖃᑕᐅᕗᖅ, ᐊᒻᒪᓗ ᑕᒪᐃᑎᒍᑦ ᐋᓐᓂᖅᓯᕆᓂᐅᔪᓂᒃ ᐱᕋᔭᖕᓂᕐᓄᑦ ᐊᒥᓲᓂᖏᑦ ᒪᕐᕈᐃᓪᓗᐊᖅᑑᕗᑦ ᑲᓇᑕᓕᒫᒥ ᑕᐃᒪᐃᒐᔪᖕᓂᖓᓂ. ᐸᓖᓯᒃᑯᑦ ᓇᓚᐅᑦᑖᕆᕗᑦ ᐃᒥᐊᓗᖕᒧᑦ ᐋᖓᔮᕐᓂᐅᔪᑦ ᐱᑎᑦᑎᕙᖕᓂᖏᓐᓂ ᑎᑭᐅᒪᔪᒧᑦ 95%−ᒥ ᖃᐃᖁᔨᓂᐅᔪᓄᑦ ᐊᒻᒪᓗ ᑎᒍᔭᐅᓂᐅᔪᓄᑦ ᓄᓇᕗᒻᒥ.

ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐅᓂᒃᑳᕆᓚᐅᕆᕗᖅ ᓇᑉᐸᓪᓗᐊᑉ ᐅᖓᑖᓂ ᓯᖓᐃᔪᓄᑦ ᐊᕐᓇᓄᑦ ᐃᒥᐊᓗᓲᖑᓂᖏᓐᓂ ᓯᕗᓪᓕᕐᓂ ᑕᖅᑭᓄᑦ ᓯᖓᐃᓂᖏᓐᓂ, ᐊᒻᒪᓗ ᐅᖓᑖᓂ 1/4−ᒥ ᓱᕈᓯᓂᒃ ᐃᓅᔪᓂᒃ ᓄᓇᕗᒻᒥ ᑕᑯᒃᓴᐅᓂᖃᖅᐳᑦ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ (FASD), ᐱᑎᑕᐅᕙᒃᑐᓂ ᐊᕐᓇᐃᑦ ᐃᒥᐊᓗᖕᒥ ᐃᒥᖃᑦᑕᖅᑎᓪᓗᒋᑦ ᓯᖓᐃᑎᓪᓗᒋᑦ. ᐃᒥᐊᓗᖕᒥ ᐊᑐᖃᑦᑕᕐᓂᖅ ᑲᑎᙵᓂᕆᑎᑕᐅᕙᒃᑭᕗᖅ ᓂᑲᓪᓗᖓᓂᕐᒧᑦ ᐊᒻᒪᓗ ᐃᒻᒥᓃᕐᓂᕐᒧᑦ ᓄᓇᕗᒻᒥ.

ᐊᐃᑦᑖᖑᒐᓗᐊᖅ, ᓄᖅᑲᖅᑎᑦᑎᓂᖅ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᓇᓗᓇᐃᖅᓯᓚᐅᖅᐳᑦ ᐋᓐᓂᕐᓇᕐᔪᐊᕐᓂᖓᓂ ᐊᒃᑐᐃᓂᐅᓂᖓᓂ ᐃᒥᐊᓗᖕᒥ ᐊᑐᖃᑦᑕᕐᓂᕐᒧᑦ ᐃᓚᒌᖑᔪᓄᑦ. ᐃᓄᓕᕆᔨᒃᑯᑦ ᓇᓚᐅᑦᑖᕆᕗᑦ 90%−ᓗᐊᒥᒃ ᓱᕈᓯᓄᑦ ᓴᐳᔾᔨᓯᒪᔭᕆᐊᖃᕐᓂᐅᔪᓄᑦ ᐱᔾᔪᑎᖃᖅᐸᒃᐳᑦ ᐃᒥᐊᓗᖕᒧᑦ. ᓱᕈᓰᑦ ᐊᖓᔪᖅᑳᖃᖅᑐᓂᒃ ᐃᒥᖅᐸᒃᑐᓂ ᐅᓗᕆᐊᓇᖅᑐᒦᓪᓗᑎᒃ ᐃᓅᓯᓕᒫᖓᓐᓂ ᐊᑲᐅᙱᓕᐅᕈᑎᖃᕈᓐᓇᖅᐳᑦ, ᐃᓚᖃᕐᓗᓂ ᐃᒻᒥᓂᒃ−ᐅᐱᒋᓗᐊᙱᓐᓂᐅᔪᒥᒃ, ᑭᐱᙳᖃᑦᑕᕐᓂᕐᒧᑦ ᐊᒻᒪᓗ ᓂᑲᓪᓗᖓᓂᕐᒧᑦ.

ᐅᔾᔨᖅᓱᖅᑕ ᐅᖃᕋᓱᐊᙱᑦᑐᑦ ᐃᓄᐃᑦ ᐃᒥᐊᓗᒃᑐᕆᐊᖃᙱᓐᓂᖓᓐᓂ. ᐃᓕᓐᓂᐊᖅᑎᑦᑎᓂᐅᓂᖅᓴᐅᓂᐅᕗᖅ ᓄᓇᕗᒻᒥᐅᓂ ᐊᑦᑕᓇᔾᔭᐃᖅᓯᒪᓂᕐᒥᑦ ᐊᒻᒪᓗ ᐃᓅᖃᑎᒌᖕᓂᒃᑯᑦ ᑲᒪᑦᑎᐊᕐᓂᐅᔪᒥᑦ ᐃᒥᐊᓗᖕᒥ ᐃᒥᕐᓂᕐᒧᑦ ᒥᒃᖠᒋᐊᖅᑎᑦᑎᓂᐊᖅᑐᒥᒃ ᐊᑐᕐᓂᕐᓗᒃᑎᑦᑎᓂᐅᔪᒥᒃ ᑕᐃᒃᑯᓄᖓ ᐃᒥᕈᒪᕙᒃᑐᓄᑦ. ᑕᐅᑐᙳᐊᖅᑕᐅᓂᖓ ᓄᓇᕗᒻᒥᐅᑦ ᖃᐅᔨᒪᓂᖃᕐᓂᐊᕐᓂᖏᓐᓂ ᐊᒻᒪᓗ ᐊᔪᙱᓐᓂᐅᔪᓂ ᐊᑐᖃᑦᑕᕐᓂᕐᒧᑦ ᐃᒥᓗᐊᕌᓗᙱᓐᓂᕐᒧᑦ ᐊᒻᒪᓗ ᖁᕝᕙᖅᓴᐃᓗᑎᒃ ᑲᒪᑦᑎᐊᖅᑐᒥᒃ ᐊᒻᒪᓗ ᐊᑦᑕᓇᙱᓐᓂᖅᓴᐅᔪᒥᒃ ᐊᑐᕐᓂᕐᒥᑦ ᐃᒥᐊᓗᖕᒥᑦ ᓯᕗᓂᒃᓴᐅᔪᓄᑦ ᐃᓄᖕᓄᑦ.