ᐃᒥᐊᓗᒃ ᐊᒻᒪ ᓯᖓᐃᓂᖅ
ᐊᑦᑕᓇᙱᓐᓂᖃᖅᐸ ᐃᒥᐊᓗᖕᒥ ᐃᒥᕐᓂᕐᒧᑦ ᓯᖓᐃᑎᓪᓗᒋᑦ?
ᐊᑦᑕᕐᓇᐃᓐᓇᐅᔭᖅᐳᖅ ᖃᓄᑎᒋ ᐃᒥᐊᓗᒡᓗᓂ, ᖃᖓᑐᐃᓐᓇᑦᑎᐊᖅ ᓯᖓᐃᓗᓂ, ᐃᒥᐊᓗᒃ ᐊᒃᑐᐃᓲᖑᖕᒪᑦ ᓯᖓᐃᔭᒧᑦ ᐱᕈᖅᐸᓪᓕᐊᓂᕆᔭᖓᓂ ᐊᒻᒪᓗ ᐃᓕᖅᑯᓯᓕᒫᖓᓄᑦ ᖃᕋᓴᖓᓄᑦ ᓱᔪᐃᔪᓐᓇᕐᒪᑦ ᓯᖓᐃᔭᐅᔪᒧᑦ. ᐊᕐᓇᖅ ᓯᖓᐃᑎᓪᓗᒍ, ᓯᖓᐃᓕᕋᓱᒡᓗᓂ ᐅᕝᕙᓘᓐᓃᑦ ᓄᖅᑲᓪᓗᐊᖅᐳᖅ ᐃᒥᐊᓗᒃᑐᖃᑦᑕᕐᓂᕐᒥ ᓄᑕᕋᓛᖓ ᐃᒻᒥᓂᒡᓗ ᖃᓄᐃᙱᑦᑎᐊᖁᓪᓗᒍ ᐃᒥᐊᓗᖕᒧᑦ−ᐱᑎᑕᐅᔪᒧᑦ ᐱᑎᑦᑕᐃᓕᒪᓂᕐᒧᑦ.
ᑭᓲᕙ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ (FASD)?
ᑕᒪᓐᓇ ᑕᐃᔭᐅᕗᖅ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ ᐊᒃᑐᖅᑕᐅᓯᒪᓂᖓᓂ (FASD). ᓯᖓᐃᑎᓪᓗᒋᑦ, ᐃᒥᐊᓗᒃ ᐊᓂᒍᓲᖑᕗᖅ ᐊᓈᓇᖓᓂ ᓯᖓᐃᔭᐅᔪᒧᑦ ᐊᒻᒪᓗ ᐃᖏᕐᕋᓲᖑᕗᖅ ᓯᖓᐃᔭᐅᔫᑉ ᑎᒥᖓᒍᑦ. ᐃᒥᐊᓗᒃ ᓯᒥᒃᑎᑦᑎᓲᖑᕗᖅ ᓄᑕᕋᓛᒃᓴᐅᑉ ᐱᔪᓐᓇᕐᓂᖓᓂ ᓈᒻᒪᒃᑐᒥ ᓂᕿᖃᑦᑎᑕᐅᓂᖓᓂ ᐊᒻᒪᓗ ᐊᓂᕐᓂᒃᓴᒧᑦ ᐱᕈᖅᐸᓪᓕᐊᑦᑎᐊᕐᓂᖓᓄᑦ ᖃᕋᓴᖓᓂ, ᐊᒻᒪᓗ ᐊᒃᑐᐃᓲᖑᕗᖅ ᐱᕙᓪᓕᐊᓂᖓᓂ ᐊᒻᒪᓗ ᐱᕈᕈᓐᓇᕐᓂᖓᓂ.
ᐊᒃᑐᐃᓂᐅᔪᑦ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ ᐊᒃᑐᖅᑕᐅᓯᒪᓂᖏᓐᓂ ᐃᓚᖃᕈᓐᓇᖅᐳᑦ:
ᓄᑕᕋᓛᖅ ᐃᓅᔪᖅ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ ᐱᒻᒪᕆᐅᔪᒥᒃ ᐊᒻᒪᓗ ᐃᓅᓯᓕᒫᖓᓐᓂ ᐊᔪᕈᑎᖃᕈᓐᓇᖅᐳᖅ ᐅᑯᓇᙵᑦ:
- ᓄᑖᓂᒃ ᐃᓕᑦᑎᓂᕐᒧᑦ, ᓲᕐᓗ ᓇᐃᓴᐅᓯᕆᓂᕐᒧᑦ ᐅᖃᓕᒫᕐᓂᕐᒧᓪᓘᓐᓃᑦ
- ᑭᓱᑐᐃᓐᓇᓂᒃ ᐃᖅᑲᐅᒪᓂᕐᒧᑦ
- ᓈᓚᒍᓐᓇᑦᑎᐊᕐᓂᕐᒧᑦ
- ᐱᑦᑎᐊᖃᑦᑕᐅᑎᔪᓐᓇᕐᓂᕐᒧᑦ ᐊᓯᖏᓐᓂᑦ
- ᐃᓱᒪᒃᓴᖅᓯᐅᕆᓂᕐᒧᑦ ᐅᕝᕙᓘᓐᓃᑦ ᐋᖅᑭᒃᓱᐃᓂᕐᒧᑦ ᐊᑲᐅᙱᓕᐅᕈᑕᐅᔪᓂᑦ
- ᐅᖃᓪᓚᒋᐅᖅᓴᓂᕐᒧᑦ ᐅᕝᕙᓘᓐᓃᑦ ᑐᑭᓯᓂᕐᒧᑦ ᐅᖃᐅᓯᕐᒥᑦ
ᖃᓄᐃᙱᓚᖅ ᐃᒥᕐᓂᕐᒧᑦ “ᒥᑭᑦᑐᒥᒃ” ᐃᒥᐊᓗᖕᒥᑦ ᐅᕝᕙᓘᓐᓃᑦ ᐃᒥᕐᓂᕐᒧᑦ ᖁᕕᐊᓱᖕᓇᐅᑎᓪᓗᒍ?
ᖃᐅᔨᒪᔪᖃᙱᓚᖅ ᖃᓄᑎᒋᓪᓚᕆᒃ ᐃᒥᐊᓗᖕᒥ ᐱᑎᑦᑎᕙᖕᓂᖓᓂ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ ᐊᒃᑐᐃᓂᖓᓂ. ᑕᒪᓐᓇ ᑐᕿᖃᖅᐳᖅ ᖃᓄᑎᒋ ᐊᖏᓂᖓᓂ ᐃᒥᐊᓗᒃ ᐊᑦᑕᕐᓇᕐᓂᖓᓂ ᓯᖓᐃᑎᓪᓗᒍ. ᐊᑦᑕᓇᙱᓛᖑᔪᖅ ᓂᕈᐊᕐᓂᐅᔪᒥᒃ ᐊᕐᓇᒧᑦ ᓯᖓᐃᔪᒧᑦ ᓄᖅᑲᕐᓗᓂ ᐃᒥᐊᓗᖕᒥᑦ ᒥᒃᖠᒋᐊᖅᑎᑦᑎᓂᕐᒧᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᓄᑕᕋᓛᒃᓴᒧᑦ.
ᐃᒥᐊᓗᖕᒥ ᐃᒥᖃᑦᑕᕐᓗᓂ ᐃᕕᐊᖏᒃᑯᑦ ᐊᒫᒪᒃᑎᑦᑎᑎᓪᓗᒍ ᐊᒃᑐᕐᓂᕐᓗᒃᑎᑦᑎᓂᖃᕐᓂᐊᖅᐸ ᓄᑕᕋᓛᒥᒃ?
ᐊᕐᓇᖅ ᐃᕕᐊᖏᒃᑯᑦ ᐊᒫᒪᒃᑎᑦᑎᒍᓂ, ᐃᒥᐊᓗᒃ ᓄᑕᕋᓛᕐᒧᐊᕈᓐᓇᖅᐳᖅ ᐃᒻᒧᖓᒍᑦ. ᐊᒃᑐᐃᓂᖃᕈᓐᓇᖅᐳᖅ ᓄᑕᕋᓛᑉ ᐃᒫᒪᖕᓂᖓᓄᑦ, ᓯᓂᖕᓂᖓᓂ ᐊᒻᒪᓗ ᐱᕈᖅᐸᓪᓕᐊᓂᖓᓂ. ᐊᕐᓇᖅ ᐃᒥᕈᒪᒃᐸᑦ ᐃᒥᐊᓗᖕᒥ ᐃᕕᐊᖏᒃᑯᑦ ᐊᒫᒪᒃᑎᑦᑎᑎᓪᓗᒍ ᐊᒻᒪᓗ ᖃᐅᔨᒃᑲᓐᓂᕈᒪᒍᓂ ᐅᖃᐅᓯᒃᓴᓂᒃ ᖃᓄᖅ ᐊᑦᑕᓇᙱᑦᑐᒥ ᐱᔪᓐᓇᕐᓂᕐᒧᑦ, (ᓲᕐᓗ ᒥᓪᓗᐊᖅᓯᓂᕐᒥᑦ ᐃᕕᐊᖏᖓᑕ ᐃᒻᒧᖓᓂ ᐅᕝᕙᓘᓐᓃᑦ ᐃᕕᐊᖏᒃᑯᑦ ᐊᒫᒪᒃᑎᑦᑎᕙᒌᕐᓗᓂ ᐃᒥᐊᓚᐅᙱᓐᓂᖓᓂ) ᐃᓗᐊᖅᓴᐃᔨᒧᑦ ᐅᖃᖃᑎᖃᓪᓗᐊᖅᐳᖅ ᐋᓐᓂᐊᕕᖕᒥ.
ᐃᓚᖏᑦ ᖃᓄᐃᑦᑑᓂᖏᓐᓂ ᐃᒥᐊᓗᖕᓂ ᐊᒃᑐᕐᓂᕐᓗᒃᑎᑦᑎᓂᖃᙱᓐᓂᖅᓴᐅᕙᑦ ᐊᓯᖏᓐᓂ?
ᑕᒪᒃᑭᑦ ᖃᓄᐃᑦᑐᑐᐃᓐᓇᑦᑎᐊᑦ ᐊᒃᑐᕐᓂᕐᓗᒃᑎᑦᑎᔪᓐᓇᖅᐳᑦ ᐱᕈᖅᐸᓪᓕᐊᔪᒧᑦ ᓄᑕᕋᓛᒧᑦ, ᐃᓚᖃᖅᖢᓂ ᐱᐊ, ᕙᐃᓂ, ᑰᓚᑦ, ᓴᐃᑐᕐ ᐊᒻᒪᓗ ᓴᙱᔪᑦ ᐃᒥᐊᓗᑦ (ᓲᕐᓗ ᔨᓐ ᕚᑦᑲᓘᓐᓃᑦ). ᐊᑦᑕᓇᙱᑦᑐᒥᒃ ᐊᖏᓂᖅᑕᖃᙱᓚᖅ ᐃᒥᐊᓗᖕᒥ ᐊᕐᓇᖅ ᓯᖓᐃᑎᓪᓗᒍ.
ᐊᕐᓇᕐᒥᒃ ᐃᒥᕈᓂ ᐃᒥᐊᓗᖕᒥ ᖃᐅᔨᓚᐅᙱᓐᓂᖓᓂ ᓯᖓᐃᓂᖓᓂ?
ᐃᓛᓐᓂᒃᑯᑦ ᓯᖓᐃᓂᐅᔪᖅ ᐸᕐᓇᒃᑕᐅᓯᒪᓲᖑᙱᓚᖅ. ᕿᓚᒻᒥᐅᓂᖅᓴᒥᒃ ᓯᖓᐃᔪᖅ ᐊᕐᓇᖅ ᓄᖅᑲᕈᓂ ᐃᒥᖃᑦᑕᕐᓂᕐᒧᑦ, ᒥᒃᖠᒋᐊᖅᑎᑦᑎᕗᖅ ᐅᓗᕆᐊᓇᕐᓂᖓᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᕿᑐᙵᒃᓴᖓᓄᑦ. ᐊᕐᓇᖅ ᐃᓱᒫᓗᒃᑯᓂ ᐃᒥᐊᓗᓚᐅᖅᑕᖓᓐᓂ ᖃᐅᔨᒪᓚᐅᙱᓐᓂᖓᓂ ᓯᖓᐃᓂᖓᓂ, ᐅᐸᒍᓐᓇᖅᑐᖅ ᐋᓐᓂᐊᕕᖕᒧᑦ ᐊᒻᒪ ᐅᖃᖃᑎᖃᕐᓗᓂ ᐃᓗᐊᖅᓴᐃᔨᒧᑦ. ᐅᖃᖃᑎᒋᓂᖓ ᐊᓯᒧᑦ ᑐᓴᖅᑕᐅᔾᔮᙱᑦᑎᐊᖅᑐᖅ.
ᖃᓄᖅ ᐃᓚᒌᑦ, ᐱᖃᓐᓇᕆᔭᑦ ᐊᒻᒪ ᐊᐃᑉᐸᕆᔭᑦ ᐃᑲᔪᖅᓱᐃᔪᓐᓇᖅᐸᑦ ᓯᖓᐃᔪᓂ ᐊᕐᓇᓂᑦ?
- ᐊᔭᐅᕆᓗᑎᒃ ᐃᒥᐊᓗᒃᑕᐃᓕᒪᓂᕐᒧᑦ ᓯᖓᐃᓂᐅᔪᓂᑦ
- ᓄᖅᑲᕐᓗᑎᒃ ᒥᒃᖠᒋᐊᕐᓗᒍᓘᓐᓃᑦ ᓇᖕᒥᓂᖅ ᐃᒥᐊᓗᖕᒥ ᐊᑐᖅᐸᒃᑕᒥᓂᑦ
- ᓇᓂᓯᓂᕐᒥ ᓄᑖᓂ ᐊᒻᒪᓗ ᐊᓕᐊᓇᐃᑦᑐᓂ ᐃᒥᐊᓗᖃᙱᑦᑐᒥ ᖃᓄᐃᓕᐅᒐᒃᓴᓂᑦ ᐱᓕᕆᖃᑎᒋᓂᐊᖅᑕᕐᓂᑦ
- ᑐᓂᓯᓂᕐᒧᑦ ᐃᑲᔪᖅᓱᐃᓂᕐᒥ ᐊᒻᒪᓗ ᐊᔭᐅᕆᓂᕐᒥ, ᐸᓯᒃᖠᙱᓪᓗᓂ, ᐊᒻᒪᓗ ᐃᑲᔪᕐᓗᓂ ᓴᖅᑭᑎᑦᑎᓂᕐᒧᑦ ᐃᓱᒫᓗᖕᓇᖃᙱᑦᑐᒥ ᓯᖓᐃᓂᐅᔪᒥᑦ
ᐃᑲᔪᖅᓱᐃᓂᖅ ᐃᒥᐊᓗᒃᑐᙱᑦᑎᐊᕐᓂᕐᒧᑦ ᓯᖓᐃᑎᓪᓗᒍ
- ᐅᖃᖃᑎᖃᕆᑦ ᐃᕐᓂᓱᒃᓰᔨᒧᑦ, ᓄᓇᓕᖕᓂ ᐃᓄᓕᕆᔨᒧᑦ ᐅᕝᕙᓘᓐᓃᑦ ᖃᓄᐃᙱᑦᑎᐊᕐᓂᕐᒧᑦ ᐃᓅᓯᓕᕆᔨᒧᑦ
- ᐅᐸᒡᓗᒍ ᐋᓐᓂᐊᕕᒃ ᐊᒻᒪ ᐅᖃᖃᑎᖃᕐᓗᑎᑦ ᐃᓗᐊᖅᓴᐃᔨᒧᑦ
- ᖃᐅᔨᒋᐊᕐᓗᒍ ᑲᓇᑕᒥ ᓯᖓᐃᔪᓄᑦ ᓂᕿᑦᑎᐊᕙᖃᕐᓂᕐᒧᑦ ᐱᓕᕆᐊᖑᔪᒥᒃ (CPNP) ᓄᓇᓕᔅᓯᓐᓂ
- ᐊᐱᕆᓗᑎᒃ ᐃᒥᐊᓗᒃᑕᐃᓕᒪᓂᕐᒧᑦ ᐊᐃᑉᐸᕆᔭᕐᓂᑦ, ᐱᖃᓐᓇᕆᔭᕐᓂᑦ ᐊᒻᒪᓗ ᐃᓚᖕᓂᑦ
ᐃᑲᔪᖅᓱᐃᒃᑲᓐᓂᕐᓂᐅᔪᑦ:
- ᑲᒪᑦᓯᐊᖅᑐᑦ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ (867-979-3333)
- ᐃᒥᐊᓗᓗᐊᖅᐸᒃᑐᓄᑦ ᐃᑲᔪᕐᕕᐅᔪᓐᓇᖅᑐᓂᒃ (ᐱᑕᖃᕈᓂ ᓄᓇᓕᖕᓂ)
- ᐃᒥᐊᓗᓗᖃᑦᑕᕐᓂᕐᒧᑦ ᐊᒃᑐᖅᑕᐅᓂᑯᓂᑦ ᐃᑲᔪᕐᕕᐅᔪᓐᓇᖅᑐᓂᒃ (ᐱᑕᖃᕈᓂ ᓄᓇᓕᖕᓂ)