ᐃᒻᒥᓃᕐᓂᖅ
ᐊᑕᐅᓯᓪᓚᕆᖕᒥ ᐱᔾᔪᑎᑕᖃᙱᑦᑐᖅ ᖃᓄᐃᒻᒪᑦ ᐃᓚᖏᑦ ᐃᓄᐃᑦ ᐱᓇᓱᐊᓲᖑᓂᖏᓐᓂ ᐊᒻᒪᓗ ᐃᓱᓕᑦᑎᓂᕐᒧᑦ ᐃᓅᓯᖓᓐᓂᑦ. ᑭᓯᐊᓂ ᓄᓇᕗᒻᒥ, ᑕᑯᒃᓴᐅᓂᖃᖅᐳᖅ ᓴᙱᔪᒥᒃ ᑲᑎᙵᓂᖃᕐᓂᖓᓂ ᐃᒥᕐᔪᐊᖅᐸᖕᓂᐅᔪᒥᒃ ᐊᒻᒪᓗ ᐃᒻᒥᓃᕐᓂᕐᒧᑦ. ᐃᒥᐊᓗᒃ ᓴᖅᑭᑎᑦᑎᔪᓐᓇᖅᐳᑦ ᐃᓗᕐᔪᐊᖓᓂ ᐃᒃᐱᒋᓯᒪᔭᖏᓐᓂ ᐊᒻᒪᓗ ᑕᐃᔅᓱᒪᓂᓂ ᐃᖅᑲᐃᓂᐅᔪᓂᒃ ᐊᑐᕐᓂᕐᓗᑯᕕᓂᑐᖃᖏᓐᓂ ᐋᓐᓂᐊᕐᓂᕐᒥᓂᓪᓘᓐᓃᑦ. ᑖᒃᑯᐊ ᐃᒃᐱᖕᓂᐊᓂᐅᔪᑦ ᓴᙱᔪᐊᓘᔪᓐᓇᖅᐳᑦ ᐱᑎᑦᑎᓗᑎᒃ ᓯᕘᕋᓂᕐᒧᑦ, ᓂᑲᓪᓗᖓᓂᕐᒥᑦ ᐅᒡᒍᐊᕐᓂᕐᒧᓪᓘᓐᓃᑦ. ᐃᖅᑲᐃᒃᑲᓐᓂᕐᓂᕐᒥ ᐃᖅᑲᐅᒪᓂᐅᔪᓂᒃ ᐃᒥᕐᓗᓂ ᐅᓗᕆᐊᓇᕈᑕᐅᔪᓐᓇᖅᐳᖅ ᓇᖕᒥᓂᖅ ᐊᑦᑕᓇᔾᔭᐃᖅᓯᒪᓂᖓᓐᓂ, ᐊᒻᒪᓗᑦᑕᐅᖅ ᐊᑦᑕᓇᔾᔭᐃᖅᓯᒪᓂᐅᔪᒥᒃ ᐊᓯᖏᓐᓄᑦ.
ᒫᓐᓇ ᓄᓇᕗᒻᒥ, ᐃᒻᒥᓃᕐᓂᕐᒧᑦ ᐅᓄᕐᓂᖓ ᐃᓄᖕᓂ ᒪᒃᑯᒃᑐᓂᑦ ᑎᑭᓯᒪᕗᖅ ᑲᑉᐱᐊᓇᖅᑐᓄᑦ ᐅᓄᕐᓂᐅᔪᓄᑦ. ᐃᒻᒪᖄ, ᐃᓄᐃᑦ ᐅᓄᕐᓂᖏᓐᓂ ᑐᖁᓂᕐᒧᑦ ᐃᒻᒥᓃᕐᓂᕐᒧᑦ ᒫᓐᓇᐅᔪᒥᒃ 11−ᖏᖅᓱᖅᖢᓂ ᖁᑦᑎᖕᓂᖅᓴᐅᕗᖅ ᑲᓇᑕᓕᒫᒥᒃ ᑕᒪᒃᑮᖅᓯᒪᓂᖓᒍᑦ, ᐊᒻᒪᓗ ᒪᕐᕈᑲᓴᖕᓂ ᐱᖓᓱᓄᑦ ᐃᒻᒥᓃᖅᑐᕕᓂᕐᓂ ᐅᑭᐅᖃᖅᐳᑦ 24 ᑐᖔᓂᑦ.
ᓄᓇᕗᒻᒥ ᐃᒻᒥᓃᖅᑕᐃᓕᒪᓂᕐᒧᑦ ᐸᕐᓇᐅᑎᖓ ᐅᓂᒃᑳᕆᕗᖅ ᒪᒃᑯᒃᑐᑦ ᐅᓗᕆᐊᓇᖅᑐᒦᓐᓂᖏᓐᓂ ᐃᒻᒥᓃᕈᒪᓂᕐᒧᑦ ᐃᓕᖅᑯᓯᐅᔪᓂ ᐃᒪᐃᒃᑯᑎᒃ:
- ᐊᑐᖅᓯᒪᒍᑎᒃ ᐋᓐᓂᕐᓇᖅᑐᒥ ᓱᕈᓯᐅᓂᖃᕐᓂᕈᑎ, ᓲᕐᓗ ᐃᒃᓯᖕᓇᑰᓗᑎᒃ, ᑎᒥᒥᒍᑦ ᐋᓐᓂᖅᓯᖅᑕᐅᖃᑦᑕᕐᓂᑰᓗᑎᒃ ᖁᓄᔪᕐᓂᐊᖅᑕᐅᓯᒪᒍᑎᒡᓘᓐᓃᑦ
- ᐃᓱᒪᒧᑦ ᐊᑲᐅᙱᓕᐅᕈᑎᖃᕈᑎᒃ, ᐊᒻᒪᓗ
- ᐃᒥᐊᓗᓗᐊᖃᑦᑕᕐᓗᑎᒃ ᐊᒻᒪᓗ/ᓱᐴᖅᑐᒐᕐᓂ ᐋᖓᔮᕐᓇᖅᑐᓄᑦ
ᒪᓕᒃᖢᒍ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑕᐅᓂᑯᖓᓂ, 36 ᐳᓴᓐᑎᐅᔪᑦ ᐃᓄᖕᓂ ᖃᐅᔨᓴᖅᑕᐅᓂᑯᓂ ᐅᖃᓚᐅᖅᐳᑦ ᐃᒻᒥᓃᕋᓱᓚᐅᖅᓯᒪᓂᖏᓐᓂ ᖃᖓᑐᐃᓐᓇᖅ ᐃᓅᓯᖓᓐᓂ, ᐊᒻᒪᓗ ᐊᑕᐅᓯᕐᒥ ᐱᖓᓱᓄᑦ ᐃᓄᖕᓂ ᐅᖃᓚᐅᖅᐳᑦ ᐃᒥᐊᓗᖕᒥ ᐃᒥᓚᐅᕐᓂᖏᓐᓂ ᐃᒻᒥᓃᕋᓱᓚᐅᖅᑎᓪᓗᒋᑦ.
ᐃᑲᔪᖅᑕᐅᔭᕆᐊᖃᖅᐲᑦ?
ᐃᕝᕕᑦ ᐊᓯᖕᓂᓪᓘᓐᓃᑦ ᐅᖃᐅᓯᖃᖅᓯᒪᒍᑎᒃ ᐃᒻᒥᓃᕈᒪᓂᐅᔪᒥᒃ, ᐋᓐᓂᐊᕕᓕᐊᓪᓗᐊᖅᐳᑦ ᐅᕝᕙᓘᓐᓃᑦ ᐅᖃᓗᒡᕕᒋᒍᒃ ᑲᒪᑦᓯᐊᖅᑐᑦ ᐃᑲᔪᖅᑕᐅᕕᖕᒥ ᐅᖃᓗᒡᕕᒃᓴᐅᔪᒧᑦ (1-867-979-3333) ᓄᓇᕘᑉ 24/7−ᒥ ᐃᒻᒥᓃᖅᑕᐃᓕᒪᓂᕐᒧᑦ ᐊᒻᒪ ᑐᐊᕕᕐᓇᖅᑐᒧᑦ ᐅᖃᓗᒡᕕᒃᓴᖓᓄᑦ.
ᖃᐅᔨᒋᐊᒃᑲᓐᓂᕐᓂᕐᒧᑦ ᐅᖃᐅᓯᒃᓴᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑎᓄᑦ ᓇᕿᒍᒃ ᐅᕘᓇ.