ᓄᓇᓕᖕᓂ ᐊᒃᑐᕐᓂᕐᓗᒃᑎᑦᑎᓂᐅᔪᑦ
ᐃᓛᓐᓂᒃᑯᑦ ᐃᓱᒪᒋᔭᐅᓲᖑᕗᖅ ᐃᒥᐊᓗᖕᒥ ᐃᒥᓗᐊᖃᑦᑕᖅᖢᓂ ᐊᒃᑐᕐᓂᕐᓗᒃᑎᑦᑎᖃᑦᑕᕐᓂᖓᓂ ᑖᔅᓱᒥᖓ ᐃᒥᖅᑎᐅᔪᒧᑦ. ᑭᓯᐊᓂ ᐃᒥᕐᔪᐊᖃᑦᑕᕐᓂᐅᔪᖅ ᑐᕌᒐᖃᕈᓐᓇᖅᐳᖅ ᐃᓅᖃᑎᒌᖕᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐊᒃᑐᐃᕙᒃᑐᓂ ᑭᒃᑯᓕᒫᓂᒃ ᓄᓇᓕᖕᓂᑦ.
ᐃᒥᐊᓗᕐᔪᐊᖃᑦᑕᕐᓂᖅ ᐱᐅᙱᑦᑐᒧᑦ ᐊᒃᑐᐃᓂᖃᕈᓐᓇᖅᐳᖅ ᐱᓐᓇᕆᔭᖃᑦᑎᐊᕐᓂᕐᒧᑦ ᐃᓚᖕᓂᑦ ᐊᒻᒪ ᐱᖃᓐᓇᕆᔭᕐᓂᑦ, ᐊᒻᒪᓗ ᐊᒃᑐᕐᓂᕐᓗᒃᑎᑦᑎᓂᖃᕈᓐᓇᖅᐳᖅ ᓄᓇᓕᖕᓂ ᐊᖏᒡᓕᒋᐊᖅᑐᒃᑯᑦ ᐱᕋᔭᖕᓂᕐᓂ ᐊᒻᒪᓗ ᐊᒃᓱᕉᓴᒃᑲᓐᓂᖅᑎᑦᑎᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᒻᒪᓗ ᓄᓇᓕᖕᓂ ᐱᔨᑦᑎᕋᕐᓂᕐᓄᑦ.
ᓄᓇᕗᒻᒥᐅᑦ ᐊᒃᓱᕈᖅᓯᒪᕗᑦ ᓇᓂᓯᓂᕐᒧᑦ ᐊᑑᑎᖃᑦᑎᐊᖅᑐᒥ ᐱᓕᕆᓂᐅᔪᓂ ᑭᐅᓂᕐᒧᑦ ᐆᒥᖓ ᐱᒻᒪᕆᐅᔪᒥ ᐃᓄᓕᒫᓄᑦ ᐋᓐᓂᐊᖃᕐᓇᕐᓂᕐᒧᑦ ᐊᑲᐅᙱᓕᐅᕈᑕᐅᔪᒥ. ᓄᓇᓕᐅᔪᑦ ᐱᒻᒪᕆᐅᔪᒥ ᐊᑐᕐᓂᖃᐅᑎᖃᖅᐳᑦ ᐊᑐᕐᓂᕐᒧᑦ ᐱᐅᓯᒋᐊᖅᑎᑦᑎᓂᕐᒧᑦ ᐃᓄᓕᒫᓂ ᐊᑦᑕᓇᙱᓐᓂᖓᓂ ᖁᕝᕙᖅᓴᐃᓕᒃᑯᑦ ᐊᑦᑎᒃᑐᒥ−ᐅᓗᕆᐊᓇᕐᓂᖓᓂ ᐃᒥᐊᓗᖕᒥ ᐃᒥᖃᑦᑕᕐᓂᕐᒧᑦ ᐃᓕᖅᑯᓯᐅᔪᓂᑦ ᐊᒻᒪᓗ ᓴᖅᑭᑎᑦᑎᓂᕐᒧᑦ ᐊᑦᑕᓇᙱᓐᓂᖅᓴᓂ ᐊᕙᑎᐅᔪᓂᑦ ᐃᒥᐊᓗᒃᑐᖃᖅᑎᓪᓗᒍ. ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐃᒥᐊᓗᖃᑦᑕᕐᓂᕐᒧᑦ ᐃᓕᖅᑯᓯᐅᔪᑦ ᐱᑎᑦᑐᓐᓇᖅᐳᑦ ᐊᒥᓱᓂ ᐊᔾᔨᒌᙱᕈᓘᔭᖅᑐᓂ ᐋᖅᑭᒃᓯᒪᓂᐅᔪᓂᑦ, ᓲᕐᓗ ᐃᖅᑲᓇᐃᔭᕐᕕᓂᑦ, ᓚᐃᓴᓐᓯᓕᖕᓂ ᐃᓂᐅᔪᓂᑦ, ᐱᙳᐊᕐᕕᖕᓂᑦ ᐊᒻᒪᓗ ᐊᓯᖏᓐᓂ ᓄᓇᓕᖕᓂ ᑲᑎᙵᓂᐅᕙᒃᑐᓂᑦ.
ᐅᓇ ᐃᓚᖓ ᐅᓂᒃᑳᕆᕗᖅ ᐃᓅᖃᑎᒌᖕᓂᕐᒧᑦ ᐊᒃᑐᕐᓂᕐᓗᒃᑎᑦᑎᓂᐅᔪᓂᑦ ᐱᑎᑕᐅᔪᓄᑦ ᐃᒥᐊᓗᓗᐊᖃᑦᑕᕐᓂᕐᒧᑦ, ᐊᒻᒪᓗ ᐃᓂᐅᔪᓂᑦ ᓄᓇᓕᐅᔪᑦ ᑕᐅᑐᒃᑕᑐᐊᖃᑲᐃᓐᓇᕈᓐᓇᕐᓂᖏᓐᓂ ᐊᒃᓱᕉᑎᖏᓐᓂ ᒥᒃᖠᒋᐊᖅᑎᑦᑎᓂᕐᒧᑦ ᐅᖁᒪᐃᓐᓂᖓᓂ ᐊᒃᑐᕐᓂᕐᓗᒃᑎᑦᑎᓂᐅᔪᓂᑦ ᐊᒻᒪᓗ ᐃᓅᖃᑎᒌᖕᓂᕐᒧᑦ ᐊᑭᖏᓐᓂ ᐃᓚᒋᔭᐅᔪᓂ ᐃᒥᐊᓗᖕᒥ ᐊᑐᕐᓂᕐᒧᑦ.