ᓱᓇᐅᒻᒪᑕ ᐃᒥᐊᓗᓕᕆᔩᑦ ᑲᑎᒪᔨᕋᓛᑦ?

ᐃᒥᐊᓗᓕᕆᔩᑦ ᑲᑎᒪᔨᕋᓛᑦ (AEC) ᑲᑐᔾᔨᖃᑎᒌᑉᐸᑦᑐᑦ ᓄᓇᓕᕐᒥᐅᑕᐃᑦ ᓂᕈᐊᖅᑕᐅᓯᒪᓪᓗᑎᒃ ᐃᓚᒋᔭᐅᓂᕐᒧᑦ, ᐊᐅᓚᑦᑎᔨᐅᓗᑎᒃ ᐃᒥᐊᓗᐃᑦ ᖃᓄᐃᓪᓗᐊᖅᑐᑦ ᓄᓇᓕᓐᓅᕈᓐᓇᕐᒪᖔᑕ, ᐃᓕᓐᓂᐊᑎᑦᑎᔪᓐᓇᕐᒪᖔᑕ ᐃᑉᐱᒍᓱᑦᑎᐊᓂᒃᑯᑦ ᐊᑐᕐᓂᕐᒥᑦ ᐃᒥᐊᓗᒻᒥᑦ, ᐊᒻᒪ ᐅᐸᓗᖓᐃᔭᐅᔪᓐᓇᕐᒥᔪᑦ ᓄᓇᓕᓐᓂ ᐱᔨᑦᓯᕋᐅᑎᓂᑦ ᐊᒻᒪ ᐱᓕᕆᐊᑦᓴᓂᑦ. ᖃᓄᖅ ᐊᑑᑎᖃᕐᓂᖏᓐᓂᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐃᑲᔪᕐᓂᒃᑯᑦ ᒥᑭᓪᓕᒋᐊᕆᓂᕐᒥᑦ ᐃᒥᐊᓗᒻᒧᑦ ᐊᑦᑐᐊᔪᓄᑦ ᐅᓗᕆᐊᓇᖅᑐᓂᑦ ᓄᓇᓕᓐᓄᑦ ᐊᑕᐅᑦᑎᒃᑯᑦ ᐱᐅᔪᒃᑯᑦ ᐊᑦᑐᐃᓂᖃᖃᑕᐅᕙᑦᑐᑎᒃ ᐃᓕᓐᓂᐊᑎᑦᑎᓂᒃᑯᑦ ᐊᒻᒪ ᐅᔾᔨᖅᑐᐃᓂᒃᑯᑦ.

 

ᖃᓄᕐᓕ ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐃᑲᔪᕈᓐᓇᕐᒪᑕ ᓄᓇᓕᒻᒥᑦ?

ᐊᑎᖓᑦ ᑲᑎᒪᔨᕋᓛᑦ ᐃᓱᒪᓕᐅᕆᓯᒪᔫᔮᕐᒪᑕ, ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐃᑉᐱᒍᓱᑦᑎᐅᔪᓐᓇᖅᑐᑦ ᐃᓕᓐᓂᐊᑎᑦᑎᓂᕐᒥᑦ ᓄᓇᓕᓐᓂᑦ ᐃᑉᐱᒍᓱᑦᑎᐊᕈᑎᓂᑦ ᐃᒥᐊᓗᒻᒥᑦ ᐊᑐᕐᓂᐊᕐᓗᓂ ᐊᒻᒪ ᖃᓄᖅ ᒥᑭᓪᓕᒋᐊᖅᑎᑦᑎᔪᓐᓇᕐᒪᖔᑕ ᐅᓗᕆᐊᓇᖅᑐᓂᑦ ᐅᑯᓅᓇ:

  • ᐅᐸᓗᖓᐃᔭᐃᕙᓐᓂᖅ ᖃᓄᐃᓕᐅᕈᑎᑦᓴᓂᑦ ᖃᓄᑐᐃᓐᓇᖅ ᐃᓕᓐᓂᐊᑎᑦᑎᔾᔪᑎᒍᑦ ᓄᓇᓕᕐᒥᐅᑕᓂᑦ ᐱᔾᔪᑎᓕᓐᓂᑦ ᐃᑉᐱᒍᓱᑦᑎᐊᓂᒃᑯᑦ ᐃᒥᐊᓗᒻᒥᑦ ᐊᑐᕐᓂᕐᒥᑦ ᐊᒻᒪ ᐅᓗᕆᓇᐅᑎᖏᓐᓂᑦ ᐃᒥᐊᓗᒻᒥᑦ ᐊᑐᕐᓂᓗᖅᑐᓂ
  • ᐋᖅᑭᑦᓱᐃᕙᓐᓂᖅ ᐅᖃᖃᑕᐅᕙᓐᓂᒃᑯᑦ ᐱᔨᑦᓯᕋᐅᑎᓂᑦ ᓄᓇᓕᕐᒥᐅᑕᓄᑦ ᐊᑦᓱᕉᓴᑦᑐᓄᑦ ᐃᒥᐊᓗᒻᒥᑦ ᐊᑐᕐᓂᓗᕐᓂᕐᒥᑦ
  • ᐊᑐᖅᑕᐅᑎᑦᑎᓇᓱᐊᖅᐸᓐᓂᖅ ᐱᓕᕆᐊᑦᓴᓂᑦ ᐱᑦᑕᐃᓕᒪᐅᑎᑦᓴᓂᑦ ᐃᒥᐊᓗᒻᒥᑦ ᐊᑐᕐᓂᓗᕐᓂᕐᒥᑦ

ᐃᑉᐱᒍᓲᑎᖏᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐅᖓᕝᕙᒋᐊᕐᓯᒪᕙᒻᒥᔪᑦ ᐊᐅᓚᑦᑎᓂᒃᑯᑦ ᐊᒻᒪ ᓇᒧᑦ ᓯᐊᒻᒪᐃᑎᕆᕙᓐᓂᒃᑯᑦ ᐃᒥᐊᓗᒻᒥᑦ ᓄᓇᓕᐅᑉ ᐃᓗᐊᓂ. ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐱᓕᕆᑎᑕᐅᑐᐃᓐᓇᕆᐊᖃᕐᒥᔪᑦ ᐅᑯᓂᖓ:

  • ᐊᖏᖅᐸᓐᓂᖅ ᑭᒃᑯᑦ ᐃᒥᐊᓗᒻᒥᑦ ᓄᓇᓕᓐᓅᕐᓯᔪᓐᓇᕐᒪᖔᑕ ᐊᒻᒪ ᖃᓄᑎᒋ ᓇᑦᓴᕈᓐᓇᕐᒪᖔᑕ ᓄᓇᓕᓐᓄᑦ
  • ᐊᖏᖅᐸᓐᓂᖅ ᑭᒃᑯᑦ ᐱᖃᕈᓐᓇᕐᒪᖔᑕ, ᐱᓯᒪᑦᑎᒍᓐᓇᕐᒪᖔᑕ ᐅᕝᕙᓘᓐᓃᑦ ᐊᑐᕈᓐᓇᕐᒪᖔᑕ ᐃᒥᐊᓗᒻᒥᑦ ᓄᓇᓕᐅᑉ ᐃᓗᐊᓂ
  • ᐊᖏᖅᐸᓐᓂᖅ ᑭᒃᑯᑦ ᓂᐅᕕᕈᓐᓇᕐᒪᖔᑕ ᐃᒥᐊᓗᒻᒥᑦ
  • ᓇᓗᓇᐃᔭᐃᓂᖅ ᖃᓄᐃᓪᓗᐊᖅᑐᓂᑦ ᐃᒥᐊᓗᒻᒥᑦ ᐊᐅᓪᓛᑎᕆᔪᓐᓇᕐᒪᖔᑕ ᓇᒧᑦ

 

ᓱᓇᐅᒻᒪᑕ ᐃᑲᔫᑎᐅᔪᓐᓇᖅᑐᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᓇᓱᓐᓂᐊᕐᓗᓂ?

ᐃᓕᓴᐃᔨᐅᓂᒃᑯᑦ ᐊᒻᒪ ᓄᓇᓕᓐᓂ ᓯᕗᓕᖅᑎᐅᓂᒃᑯᑦ, ᐃᒥᐊᓗᓕᕆᔩᑦ ᑲᑎᒪᔨᕋᓛᑦ ᐱᐅᔪᒃᑯᑦ ᐊᑦᑐᐊᓂᖃᕋᓱᒍᓐᓇᑎᐊᖅᑐᑦ ᓄᓇᓕᓐᓂ ᐱᔨᑦᓯᕋᕐᕕᒋᔭᒥᓂ. ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᔪᑦ ᐃᑲᔪᕈᓐᓇᖅᑐᑦ ᐱᓗᐊᔾᔭᐃᕐᓯᒪᑎᑦᑎᓂᕐᒥᑦ ᐊᑦᓱᕉᑎᐅᕙᑦᑐᓂᑦ ᐃᒥᐊᓗᒻᒥᑦ ᐊᑐᕐᓂᓘᑎᓂᑦ ᐃᓕᓐᓂᐊᑎᑦᑎᑲᓐᓂᓂᒃᑯᑦ ᐃᑉᐱᒍᓱᑦᑎᐊᓂᒃᑯᑦ ᐃᒥᐊᓗᒻᒥᑦ ᐊᑐᕐᓂᕐᒥᑦ ᐊᒻᒪ ᑐᕌᖓᓂᕐᓴᒃᑯᑦ, ᐊᐅᓚᑦᑎᓂᒃᑯᑦ ᖃᓄᐃᓪᓗᐊᖅᑐᓂᑦ ᐊᒻᒪ ᓇᒧᑦ ᓯᐊᒻᒪᐃᔪᓐᓇᕐᒪᖔᑕ ᐃᒥᐊᓗᒻᒥᑦ ᓄᓇᓕᐅᑉ ᐃᓗᐊᓂ. ᐊᑭᓕᖅᑕᐅᒐᓛᑉᐸᑦᑐᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᔪᑦ ᑲᑎᒪᖃᑕᐅᒐᐃᒐᒥᒃ.

 

ᖃᓄᕐᓕ ᐃᓚᒋᔭᐅᔪᓐᓇᖅᑯᖓ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ?

ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᔪᑦ ᓂᕈᐊᖅᑕᐅᕙᑦᑐᑦ ᑲᑎᒪᔨᕋᓛᖑᓂᕐᒧᑦ ᐊᕐᕌᒍᑕᒫᖅ. ᓂᕈᐊᖅᐸᑦᑐᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᑦᓴᓂᑦ ᐊᑕᐅᑦᑎᒃᑯᑦ ᓄᓇᓕᓐᓂ ᓯᕗᓕᖅᑎᑦᓴᓂᑦ ᓂᕈᐊᕐᓂᖃᖅᑎᓪᓗᒋᑦ ᑭᒃᑯᑐᐃᓐᓇᐃᑦ ᓂᕈᐊᕈᓐᓇᖁᓪᓗᒋᑦ ᐊᑕᐅᓯᐊᕐᓗᑎᒃ ᐊᕐᕌᒍᑕᒫᖅ.

ᓂᕈᐊᒐᑦᓴᐅᔪᒪᔪᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐅᑯᓂᖓ ᒪᓕᒋᐊᓖᑦ:

  1. ᑲᓇᑕᒥᐅᑕᓗᑎᒃ;
  2. ᐊᕐᕌᒍᖃᕐᓗᑎᒃ 18-ᓂᑦ ᐊᖏᔪᑦᑎᐅᓗᑎᓪᓘᓐᓃᑦ ᓂᕈᐊᕐᓇᐅᑉ ᐅᓪᓗᖓᓂ;
  3. ᓄᓇᕗᒻᒥᐅᑕᐅᓯᒪᓗᓂ ᐊᕐᕌᒍᒥᑦ ᐊᑕᐅᓯᕐᒥᑦ ᐅᖓᑖᓂᓘᓐᓃᑦ ᓂᕈᐊᕐᓇᐅᑉ ᐅᓪᓗᖓᓂ;
  4. ᓄᓇᓕᕐᒥᐅᑕᐅᓗᓂ ᓄᓇᓕᒻᒥ ᓂᕈᐊᒐᑦᓴᐅᕕᒋᓂᐊᖅᑕᒥᓂ.

ᓂᕈᐊᒐᑦᓴᐃᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᓂᕈᐊᕐᓇᓂ ᐃᒪᐃᑦᑑᒋᐊᖃᖕᖏᑦᑐᑦ:

  1. ᓂᕈᐊᖅᑐᓕᕆᔨᐅᓗᑎᒃ;
  2. ᐃᖅᑲᖅᑐᐃᔨᐅᓗᑎᒃ ᓇᒥᑐᐃᓐᓇᖅ ᐃᖅᑲᖅᑐᐃᕕᒻᒥ, ᐊᓯᐊᒍᑦ ᐃᓄᓐᓄᑦ ᐃᖅᑲᖅᑐᐃᕕᓐᓂ;
  3. ᑭᓇᑐᐃᓐᓇᖅ ᓂᕈᐊᒐᑦᓴᐅᔪᓐᓇᐅᑎᑕᐅᖕᖏᑦᑐᑦ ᐃᓱᒪᓕᕆᓂᒃᑯᑦ ᐱᔾᔪᑎᖃᕈᓂ;
  4. ᑭᓇᑐᐃᓐᓇᖅ ᑎᒍᔭᐅᖅᑲᔪᖅ ᐊᓐᓄᓪᓚᑦᓰᕕᒻᒥ ᐅᕝᕙᓘᓐᓃᑦ ᐃᑲᔪᖅᑕᐅᕕᒻᒥ;
  5. ᑭᓇᑐᐃᓐᓇᖅ ᓂᕈᐊᖅᑐᓕᕆᓂᒃᑯᑦ ᒪᓕᒐᕐᒥᑦ ᓱᕋᐃᓯᒪᔪᑦ ᓇᒥᑐᐃᓐᓇᑦᑎᐊᖅ ᑲᓇᑕᐅᑉ ᐃᓗᐊᓂ ᐊᕐᕌᒍᓂ ᑕᓪᓕᒪᓂ ᐊᓂᒍᕋᑖᖅᑐᓂ;
  6. ᐃᓚᒋᔭᐅᔪᑦ ᑲᑎᒪᔨᕐᔪᐊᑦ ᑲᑎᒪᕕᖏᓐᓂ ᐅᕝᕙᓘᓐᓃᑦ ᐃᑦᑑᖃᑕᐅᔪᓄᑦ ᓯᓇᑐᓄᑦ ᐅᕝᕙᓘᓐᓃᑦ ᐃᓚᒋᔭᐅᔪᑦ ᒪᓕᒐᓕᕆᔨᓄᑦ.

ᑭᓇᑐᐃᓐᓇᑦᑎᐊᖅ ᓂᕈᐊᒐᑦᓴᐅᔪᒪᔪᖅ ᓇᓗᓇᐃᕐᓯᔪᓐᓇᖅᑐᖅ ᓄᓇᓕᖏᓐᓂ ᓂᕈᐊᖅᑐᓕᕆᔨᒻᒪᕆᒻᒧᑦ. ᑐᑭᓯᒋᐊᒃᑲᓐᓂᕐᕕᑦᓴᖅ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᓇᓱᒍᒪᓂᕐᒥᑦ ᖃᐅᔨᒋᐊᕈᓐᓇᖅᑐᑦ ᑭᐊᓂ ᐱᐅᓪᒥᑦ ᐅᖄᓚᕕᒋᓗᒍ ᐅᕗᖓ (867) 975-6816.

 

ᓱᓇᑦ ᐃᓕᓐᓂᐊᖅᑐᓕᕆᓂᒃᑯᑦ ᐃᑲᔪᕐᓱᐃᔾᔪᑎᖃᖅᐸᑦ ᐱᓕᕆᔾᔪᑎᒍᑦ ᐊᑐᐃᓐᓇᐅᔪᓂᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᔪᓄᑦ?

ᐅᔾᔨᖅᓱᖅᑕ ᐊᑐᐃᓐᓇᐅᑎᑦᑎᔪᑦ ᐃᓕᓐᓂᐊᕈᑎᑦᓴᓂᑦ ᐊᒻᒪ ᐃᑲᔪᕐᓱᐃᔾᔪᑎᑦᓴᓂᑦ ᐱᓕᕆᔾᔪᑎᓂᑦ ᐃᒥᐊᓗᓕᕆᔩᑦ ᑲᑎᒪᔨᕋᓛᓄᑦ ᐃᓚᒋᔭᐅᔪᓄᑦ ᐃᑲᔫᑎᐅᖁᓪᓗᒋᑦ ᐅᐸᓗᖓᐃᔭᐃᓂᒃᑯᑦ ᓄᓇᓕᓐᓂ ᐱᓕᕆᔾᔪᑎᑦᓴᓂᑦ ᐊᒻᒪ ᐃᑲᔪᕐᓱᐃᓂᒃᑯᑦ ᐱᕙᓪᓕᐊᑎᑦᑎᓂᒃᑯᑦ ᐃᓕᓐᓂᐊᕈᑎᑦᓴᓂᑦ ᐱᓕᕆᐊᑦᓴᓂᑦ. ᐃᓚᒋᔭᐅᓗᑎᒃ ᐱᓕᒻᒪᑦᓴᐅᑎᑦᓴᓂᑦ ᐊᑐᐃᓐᓇᖅᑕᖃᕐᒥᔪᖅ, ᑭᖑᓪᓕᕐᒥ ᑲᑎᒪᓛᓕᕐᒥᔪᒍᑦ ᑲᖏᖦᖠᓂᕐᒥ, ᓅᕕᐱᕆ 2019. ᐅᐸᒍᓐᓇᖅᑕᓯ ᑐᑭᓯᒋᐊᕈᑎᓂᑦ ᑲᑎᒪᓂᕐᓂᒃ ᒪᑉᐱᒐᕗᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᐃᓕᓐᓂᐊᕈᑎᑦᑎᓐᓂᑦ ᐊᒻᒪ ᐊᓯᖏᓐᓂᑦ ᐱᓕᕆᔾᔪᑎᒍᑦ ᐃᑲᔫᑎᑦᓴᓂᑦ.