ᑕᓪᓕᒪᑦ ᐃᑲᔪᕈᑎᒃᓴᑦ ᐊᖓᔪᖅᑳᓂᑦ ᐃᑲᔪᕐᓂᕐᒧᑦ ᑭᖑᕙᕆᐊᖅᑎᑦᑎᓂᕐᒧᑦ ᒪᒃᑯᒃᑐᓂ ᐃᒥᐊᓗᖃᑦᑕᕐᓂᖏᓐᓂ

1. ᐃᓕᓯᓗᑎᒃ ᐃᓚᒌᓄᑦ ᒪᓕᒋᐊᓕᖕᓂᑦ

ᑕᑯᒃᓴᐅᑎᑦᑎᓗᓂ ᐋᔩᖃᑎᒌᖕᓂᕐᒥ − ᐃᓄᐃᑦ ᐃᓅᖃᑎᒌᖕᓂᕐᒥ ᐱᓐᓇᕆᔭᐅᔪᑦ ᐃᓱᒪᓕᐅᕆᓂᕐᒥ ᐅᖃᓪᓚᖕᓂᒃᑯᑦ ᐊᒻᒪ ᐊᖏᖃᑎᒌᖕᓂᕐᒧᑦ. ᐃᓚᐅᑎᑦᑎᓇᓱᐊᕐᓗᑎᑦ ᓄᑕᖅᑲᓂ ᐱᕙᓪᓕᐊᑎᑦᑎᓂᕐᒥᑦ ᒪᓕᒋᐊᓕᖕᓂᑦ ᐊᒻᒪᓗᖃᓄᐃᓐᓂᐅᓂᐊᕐᓂᖏᓐᓂ ᐅᑭᐅᑭᓗᐊᕐᓗᑎᒃ ᐃᒥᐊᓗᖕᓂᕐᒧᑦ. ᕿᑐᙵᑎᑦ ᒪᓕᖕᓂᖅᓴᐅᔪᓐᓇᖅᐳᑦ ᒪᓕᒐᐅᔪᓂᑦ ᐱᔪᓐᓇᖅᑎᑕᐅᒍᑎᒃ ᐃᓚᐅᖃᑕᐅᓂᕐᒥ ᐋᖅᑭᒃᓱᐃᖃᑕᐅᓂᕐᒧᑦ.

  • ᐅᖃᐅᓯᕆᓗᒋᑦ ᒪᓕᒋᐊᓖᑦ ᐱᔾᔪᑎᖃᖅᑐᒥ ᐃᒥᐊᓗᒋᐊᖃᙱᓐᓂᐅᔪᒥ ᐅᑭᐅᑦ 19 ᑐᖔᓂ.
  • ᑐᑭᓯᓇᑦᑎᐊᕐᓗᑎᑦ ᖃᓄᐃᓐᓂᐅᓇᔭᖅᑐᓂ ᓱᕋᐃᓂᕐᒧᑦ ᒪᓕᒐᐅᔪᓂᑦ ᐊᒻᒪᓗ ᐊᑐᖅᑏᓐᓇᕐᓗᒋᑦ.
  • ᐃᓚᒌᓕᒫᓄᑦ ᖃᐅᔨᒪᑎᓪᓗᒋᑦ ᒪᓕᒐᐅᔪᓂᑦ. 
  • ᐅᖃᐅᓯᕆᓗᒋᑦ ᒪᓕᒐᑎᑦ ᐊᓯᖏᓐᓄᑦ ᐃᓚᐅᖃᑕᐅᔪᓄᑦ ᓱᕈᓯᖅᐱᑦ ᐃᓅᓯᖏᓐᓂ, ᐊᒻᒪᓗ ᐊᐱᕆᓗᒋᑦ ᐃᒃᐱᒍᓱᑦᑎᐊᕐᓂᖏᓐᓂ ᐱᔪᒪᔭᕐᓂᑦ.
  • ᓂᙵᙱᓪᓗᑎᑦ ᒪᓕᒐᐃᑦ ᓱᕋᒃᑕᐅᒍᑎᒃ. ᕿᑐᙵᑎᑦ ᖃᐅᔨᒪᑎᒃᑭᑦ ᐃᓕᖕᓄᑦ ᐅᖃᓗᒍᓐᓇᕐᓂᖏᓐᓂ ᖃᖓᑐᐃᓐᓇᑦᑎᐊᖅ ᐅᓯᔭᐅᔭᕆᐊᖃᖅᐸᑕ ᐃᑲᔪᖅᑕᐅᔭᕆᐊᖃᕈᑎᒡᓘᓐᓃᑦ.
ᐃᑲᔪᕈᓐᓇᕋᔭᖅᐳᖅ ᐃᓱᒪᒋᔭᖃᕐᓗᓂ ᓇᖕᒥᓂᖅ ᐅᒃᐱᕆᔭᕐᓂᑦ ᐊᒻᒪᓗ ᐃᓕᖅᑯᓯᖃᕐᕕᒋᔭᑎᑦ ᐱᔾᔪᑎᓕᖕᒥ ᐃᒥᐊᓗᖃᑦᑕᕐᓂᕐᒧᑦ ᐃᓱᒪᒋᓗᒋᑦ ᐅᑯᓇᓂ ᐊᐱᖅᑯᑕᐅᔪᓂᑦ:
  • ᓂᕈᐊᕈᕕᑦ ᐃᒥᖃᑦᑕᕈᒪᙱᓪᓗᑎᑦ, ᐊᓯᖕᓂ ᐊᖏᕐᕋᕐᓂ ᐃᒥᕈᓐᓇᖅᑎᑦᑎᓲᖑᕕᑦ, ᓲᕐᓗ ᐊᓯᖏᓐᓂ ᐃᓚᒋᔭᕐᓂᑦ ᐳᓛᖅᑎᓂᓪᓘᓐᓃᑦ?
  • ᖃᓄᑎᒋ ᐃᒥᐊᓗᒃ ᐃᓚᒋᔭᐅᕙ ᐃᓅᓯᕐᓂᑦ ᐊᒻᒪᓗ ᐃᒥᖅᑕᐅᕙᒃᖢᓂ ᐊᖏᕐᕋᕐᓂᑦ, ᐃᓚᖕᓂᑦ ᓄᓇᓕᖕᓂᓗ ᑲᑎᙵᓂᐅᔪᓂᑦ?
  • ᐅᑭᐅᑭᓗᐊᖅᑐᓄᑦ ᐃᒥᐊᓗᖕᓂᖅ ᐱᕋᔭᖕᓂᐅᖕᒪᑦ, ᐃᓅᓱᒃᑐᖁᑎᑎᑦ ᐹᑎᖅᑐᓄᐊᕈᓐᓇᖅᐸᑦ ᖃᐅᔨᒪᓪᓗᑎᑦ ᐃᒥᐊᓗᒃᑕᖃᕐᓂᐊᖅᑎᓪᓗᒍ? ᐱᔪᓐᓇᖅᐸᑦ, ᐅᖃᓪᓚᖃᑎᒋᓯᒪᕕᐅᒃ ᖃᓄᖅ ᐊᑦᑕᓇᔾᔭᐃᖅᓯᒪᔪᓐᓇᕐᓂᖓᓂ ᐋᒃᑳᕐᓗᓂᓗ ᐃᒥᐊᓗᖕᒥ ᑐᓂᔭᐅᒋᐊᕈᓂ?
  • ᖃᐅᔨᒪᒍᕕᑦ ᐃᓅᓱᒃᑐᖁᑏᑦ ᐃᓛᓐᓂᓚᐅᓱᖓᕐᒥ ᐃᒥᐊᓗᖃᑦᑕᕈᓂ, ᐅᖃᓪᓚᖃᑎᒋᓯᒪᕕᐅᒃ ᖃᓄᖅ ᐊᑦᑕᓇᔾᔭᐃᖅᓯᒪᔪᓐᓇᕐᓂᕐᒥᑦ ᐃᒥᖃᑕᐅᑎᓪᓗᒍ ᐅᕝᕙᓘᓐᓃᑦ ᐊᓯᖏᓐᓃᓪᓗᓂ ᐃᒥᖅᑐᓄᑦ?

2. ᑕᑯᒃᓴᐅᑎᑦᑎᓗᑎᒃ ᑲᒪᑦᑎᐊᖅᑐᒥ ᐃᒥᐊᓗᖃᑦᑕᕐᓂᕐᒥ ᐃᓕᖅᑯᓯᖃᕐᓂᐅᔪᒥᑦ

ᐊᖓᔪᖅᑳᖑᓗᓂ ᐸᖅᑭᔨᐅᔪᓂᓪᓘᓐᓃᑦ, ᒪᓕᒍᒥᓇᖅᑑᕗᑎᑦ ᕿᑐᙵᕐᓄᑦ ᐊᒻᒪᓗ ᐊᓯᖏᓐᓄᑦ ᓄᑕᖅᑲᓄᑦ ᓄᓇᓕᖕᓂᑦ. ᐅᒃᐱᕆᔭᑎᑦ ᐊᒻᒪᓗ ᐃᓕᖅᑯᓯᖃᕐᕕᒋᔭᑎᑦ ᐃᒥᐊᓗᖕᒧᑦ ᐊᒃᑐᐃᓂᖃᕐᔪᐊᕈᓐᓇᖅᐳᖅ ᕿᑐᙵᕐᓄᑦ ᐊᒻᒪᓗ ᐊᓯᖏᓐᓄᑦ ᓄᑕᖅᑲᓄᑦ ᐃᓅᓯᕐᓂᑦ. ᓂᕈᐊᕈᕕᑦ ᐃᒥᐊᓗᖃᑦᑕᕐᓂᕐᒧᑦ, ᓄᖅᑲᕆᐊᖃᙱᓚᑎᑦ ᐃᒥᐊᓗᖕᓂᕐᒥ ᓱᕈᓯᖅᑕᖃᖅᑎᓪᓗᒍ. ᑕᑯᑎᖔᕈᓐᓇᖅᐸᑎᑦ ᖃᓄᐃᓕᐅᕐᓂᒃᑯᑦ ᐃᒥᐊᓗᒃ ᐃᓅᖃᑎᒌᖕᓂᐅᓂᖓᓂ ᐊᑐᖅᑕᐅᑦᑎᐊᕈᓂ ᐊᑦᑕᕐᓇᙱᑦᑐᒥ ᐊᒻᒪ ᑲᒪᒋᔭᖃᑦᑎᐊᕐᓗᓂ.

ᐃᑲᔪᕈᑎᒃᓴᑦ ᐊᖓᔪᖅᑳᓄᑦ ᑕᑯᒃᓴᐅᑎᑦᑎᓂᕐᒧᑦ ᑲᒪᒋᔭᖃᑦᑎᐊᖅᑐᒥ ᐃᒥᕐᓂᕐᒧᑦ ᐃᓕᖅᑯᓯᖃᕐᕕᒋᔭᖃᕐᓂᕐᒥᑦ:
  • ᐃᓗᐊᓃᓪᓗᑎᑦ ᑭᒡᓕᐅᔪᓂᑦ ᐊᑦᑎᒃᑐᒥ−ᐅᓗᕆᐊᓇᕐᓂᖓᓂ ᐃᒥᐊᓗᖕᒧᑦ ᒪᓕᒋᐊᓕᖕᓂᑦ.
  • ᑲᑎᙵᓂᖃᖅᑎᑦᑎᒍᕕᑦ ᐃᒥᐊᓗᒃᑕᖃᖅᑎᓪᓗᒍ, ᓇᓗᓇᐃᔭᐃᓗᑎᑦ ᐃᒥᐊᓗᖃᙱᑦᑐᓂ ᐃᒥᒐᒃᓴᐅᓂᐊᖅᑐᓂᑦ ᐊᑐᐃᓐᓇᖅᑕᖃᕐᓂᖓᓂ, ᐊᒻᒪᓗ ᐊᓯᑎᑦ ᐃᓄᑑᓗᑎᒃ ᐊᓂᑦᑕᐃᓕᓗᑎᒃ ᐊᖁᑦᑕᐃᓕᓗᑎᒃ ᐃᒥᖅᓯᒪᒍᑎᒃ.
  • ᐊᖁᑦᑕᐃᓕᕙᑦᑎᐊᕆᑦ ᐃᒥᐊᓗᒃᓯᒪᒍᕕᑦ ᐅᕝᕙᓘᓐᓃᑦ ᐊᖁᖃᑎᖃᕐᓗᑎᑦ ᐊᓯᖏᓐᓂ ᐃᒥᐊᓗᒃᓯᒪᔪᓂᑦ.
  • ᐅᓂᒃᑳᖅᑐᐊᙱᓪᓗᑎᑦ ᐃᒥᐊᓗᕐᔪᐊᖅᑐᖃᖅᑎᓪᓗᒍ ᑕᑯᔭᐅᔪᓐᓇᕐᒪᑕ ᐊᓕᐊᓇᐃᓐᓂᖓᓂ ᖁᕕᐊᓇᕐᓗᓂᓗ.
  • ᐸᕐᓇᐃᒃᑲᓐᓂᖅᐸᒡᓗᑎᑦ ᐃᒥᐊᓗᖃᙱᑦᑐᒥ ᖃᓄᐃᓕᐅᕐᓂᐅᔪᓂᑦ ᐊᒻᒪᓗ ᖁᕕᐊᓱᒍᑕᐅᔪᓂ ᑕᑯᒃᓴᐅᑎᑦᑎᓂᕐᒧᑦ ᐊᓕᐊᓇᐃᑦᑐᓐᓇᕐᓂᖓᓂ ᐃᒥᐊᓗᖃᙱᑎᓪᓗᒍ.
  • ᐃᒥᐊᓗᖕᒥ ᐊᑐᖅᐸᙱᓪᓗᑎᑦ ᐊᒃᓱᕈᕈᑎᖃᕐᓂᕐᒧᑦ ᑲᒪᓇᓱᐊᕐᓂᕐᒧᑦ ᐊᓯᖏᓐᓂᓪᓗ ᐃᓅᓯᐅᑉ ᐊᒃᓱᕈᕐᓇᖅᑐᖏᓐᓄᑦ. ᐃᓴᖔᕐᑎᑦ ᐅᒃᐱᕆᔭᕐᓄᑦ ᐱᖃᓐᓇᕆᔭᕐᓄᑦ, ᐃᓚᒧᑦ, ᐃᓕᓴᐃᔨᒧᑦ, ᐃᓅᓯᓕᕆᔨᒧᑦ ᐃᓄᑐᖃᕐᒧᓪᓘᓐᓃᑦ ᐅᖃᓪᓚᐅᓯᕆᓂᕐᒧᑦ.

3. ᓄᑕᖅᑲᑦ ᐃᑲᔪᕐᓗᒋᑦ ᑲᒪᒋᔭᖃᕐᓂᕐᒧᑦ ᓄᑕᖅᑲᐅᖃᑎᒥᓂᑦ ᐊᔭᐅᕆᔭᐅᓂᐅᔪᓂᑦ

ᒪᒃᑯᒃᑐᐃᑦ ᖃᓄᐃᓐᓂᐅᔪᓃᑦᑐᓐᓇᖅᐳᑦ ᐃᒥᐊᓗᒃᑕᖃᖅᑐᒥ ᐊᒻᒪᓗ ᖃᐅᔨᒪᙱᑐᐃᓐᓇᕆᐊᖃᖅᐳᑦ ᖃᓄᐃᓕᐅᕆᐊᒃᓴᖅ. ᒪᒃᑯᒃᑐᑦᐊᔭᐅᕆᔭᐅᔪᓐᓇᖅᐳᑦ ᐱᖃᓐᓇᕆᔭᖏᓐᓂᑦ ᐃᒥᐊᓗᖁᔭᐅᓂᕐᒧᑦ, ᐊᒻᒪᓗ ᐊᔪᕐᓇᕈᓐᓇᖅᐳᖅ ᐋᒃᑳᕆᐊᒃᓴᖅ. ᑕᐃᒫᒃ ᐱᒻᒪᕆᐅᕗᖅ ᐃᑲᔪᕐᓂᕐᒧᑦ ᓄᑕᖅᑲᓂ ᐱᓕᕆᓂᖏᓐᓄᑦ ᐊᔭᐅᕆᓂᐅᔪᓂᑦ ᐃᒥᐊᓗᖕᓂᕐᒧᑦ, ᐊᑦᑕᓇᙱᓐᓂᖅᓴᓂᑦ ᓂᕈᐊᕈᓐᓇᕐᓂᕐᒧᑦ ᖃᓄᐃᓐᓂᐅᔪᓂ ᐊᓯᖏᑦ ᐃᒥᖅᑎᓪᓗᒋᑦ.

ᐃᑲᔪᕈᑎᒃᓴᑦ ᐊᖓᔪᖅᑳᓄᑦ ᐃᑲᔪᕐᓂᕐᒧᑦ ᓄᑕᖅᑲᓂᑦ ᑲᒪᒋᔭᖃᕐᓂᕐᒧᑦ ᓄᑕᖅᑲᐅᖃᑎᒥᓂᑦ ᐊᔭᐅᕆᔭᐅᓂᐅᔪᓂᑦ:
  • ᐸᕐᓇᒃᐸᒌᔭᖅᓯᒪᓗᑎᒃ ᖃᓄᐃᓕᓂᐊᕐᓂᕐᒧᑦ ᐱᖃᓐᓇᕆᔭᑦ ᐅᔭᐅᕆᒍᑎᒃ ᐃᒥᖁᔨᓂᕐᒧᑦ, ᓲᕐᓗ:
    • “ᐋᒃᑲ ᖁᔭᓐᓇᒦᒃ, ᐱᙳᐊᕆᐊᖃᕋᒪ ᖃᐅᒃᐸᑦ ᐊᒻᒪᓗ ᐊᒃᑐᐃᓲᖑᖕᒪᑦ ᐱᙳᐊᕐᓂᕆᔭᓐᓂᑦ.”
    • “ᐋᒃᑲ ᖁᔭᓐᓇᒦᒃ, ᐊᓕᐊᓇᐃᒋᙱᓐᓇᒃᑯ ᐃᒃᐱᖕᓂᐊᑎᑦᑎᕙᖕᓂᓐᓂ ᐅᕙᓐᓂᑦ.”
    • “ᐋᒃᑲ ᖁᔭᓐᓇᒦᒃ, ᒪᒪᕆᙱᓐᓇᒃᑯ.”
    • “ᐋᒃᑲ ᖁᔭᓐᓇᒦᒃ, ᖃᐱᓚᓐᓂᔪᒪᙱᓐᓇᒪ ᖃᐅᒃᐸᑦ.”
  • ᐅᐸᒃᐸᙱᓪᓗᒋᑦ ᐹᑎᖅᑐᐃᑦ ᖃᓄᐃᓕᐅᕐᓂᐅᔪᓂᓪᓗ ᐃᓄᐃᑦ ᐃᒥᐊᓗᖕᓂᐊᖅᑎᓪᓗᒋᑦ.
  • ᐹᑎᖅᑐᓂ ᐃᒥᐊᓗᓕᖕᒥᑦ, ᑎᒍᒥᐊᕐᓗᑎᑦ ᐃᒥᐊᓗᖃᙱᑦᑐᒥ ᐃᒥᕐᓂᐊᖅᑕᕐᓂᑦ ᐊᔭᐅᕆᔭᐅᔾᔮᙱᓐᓇᕕᑦ ᐃᒥᐊᓗᖕᓂᕐᒧᑦ.
  • ᐃᓚᐅᖃᑕᐅᓗᑎᑦ ᐃᒥᐊᓗᖃᙱᑦᑐᓄᑦ ᖃᓄᐃᓕᐅᕐᓂᐅᔪᓂᑦ, ᓲᕐᓗ ᐱᙳᐊᕐᓂᕐᓂ, ᓴᓇᐅᒐᓕᐅᕐᓂᕐᓄᑦ, ᐱᙳᐊᕐᓂᕐᓄᑦ ᓄᓇᓕᐊᕐᓂᕐᒧᓪᓗ.
  • ᓇᓂᓯᓗᑎᑦ ᐱᖃᓐᓇᕆᔭᕐᓂ ᐊᔾᔨᐸᓗᖏᓐᓂ ᐱᓕᕆᔪᒪᓂᖃᖅᑐᓂᑦ ᐊᒻᒪᓗ ᐃᒥᐊᓗᒍᒪᙱᑦᑐᓄᑦ.
  • ᐹᑎᖅᑐᓃᒃᑯᑎᒃ ᐅᕝᕙᓘᓐᓃᑦ ᑲᑎᙵᔪᓄᑦ ᖃᓄᐃᓕᐅᕐᓂᐅᔪᒥ ᐊᒻᒪᓗ ᐅᓇᑕᖅᑐᖃᓕᖅᐸᑦ, ᐊᓂᑲᐅᑎᒋᓗᑎᑦ ᐅᖃᓗᒡᓗᑎᓘᓐᓃᑦ ᐱᖃᓐᓇᕆᔭᕐᓄᑦ ᐃᓚᖕᓄᓪᓘᓐᓃᑦ ᐃᑲᔪᖅᑕᐅᔪᒪᓗᑎᑦ.

ᐃᓱᒪᒍᕕᑦ ᐃᓅᓱᒃᑐᖁᑏᑦ ᐃᓛᓐᓂᓚᐅᓱᖓᕐᒥ ᐃᒥᐊᓗᖃᑦᑕᕈᓂ, ᐅᖃᓪᓚᖃᑎᒋᓗᒍ ᖃᓄᖅ ᐊᑦᑕᓇᔾᔭᐃᖅᓯᒪᔪᓐᓇᕐᓂᕐᒥᑦ ᐃᒥᖃᑕᐅᑎᓪᓗᒍ ᒥᒃᖠᒋᐊᖅᑎᑦᑎᓂᕐᒧᑦ ᐅᓗᕆᐊᓇᕐᓂᖓᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ. ᐃᖅᑲᐃᑎᓪᓗᒍ ᐊᐱᕆᖃᑦᑕᕐᓂᕐᒧᑦ ᐃᑲᔪᖅᑕᐅᔪᒪᓂᕐᒧᑦ ᐱᔭᕆᐊᖃᑐᐊᕌᖓᑕ, ᖃᓄᐃᑦᑐᑐᐃᓐᓇᑦᑎᐊᒧᑦ. ᑐᓂᓗᒋᑦ ᐃᒪᐃᖁᔨᓂᐅᓇᔭᖅᑐᓂ, ᓲᕐᓗ ᐅᖃᓗᖕᓂᕐᒧᑦ ᐃᓚᒥᓄᑦ, ᐱᖃᓐᓇᕆᔭᒧᑦ ᐃᓄᑐᖃᕐᒧᓪᓘᓐᓃᑦ.

4. ᑲᑎᙵᓂᖃᑦᑎᐊᕐᓗᑎᑦ ᕿᑐᙵᕐᓂᑦ

  • ᖃᐅᔨᒪᓗᒋᑦ ᕿᑐᙵᕕᑦ ᐱᖃᓐᓇᕆᔭᖏᑦ ᑭᒃᑰᓂᖏᓐᓂ ᐊᒻᒪᓗ ᓇᒦᒐᔪᖕᓂᖏᓐᓂ.
  • ᐊᐱᕆᕙᒡᓗᒋᑦ ᕿᑐᙵᑎᑦ ᐃᓕᖕᓂ ᖃᐅᔨᒪᑎᑦᑎᕙᖕᓂᖏᓐᓂ ᓇᒧᙵᐅᓂᖏᓐᓂ ᐊᒻᒪᓗ ᐃᓕᖕᓄᑦ ᐅᖃᐅᔾᔨᓗᑎᒃ ᖃᓄᐃᓕᐅᕐᓂᕆᓂᐊᖅᑕᖏᑦ ᐊᓯᔾᔨᖅᐸᑕ.
  • ᑲᑎᙵᖃᑎᒋᕙᒡᓗᒋᑦ ᐊᓕᐊᓇᐃᒍᓱᖃᑎᒋᓗᒋᑦ, ᐱᙳᐊᕐᓗᓯ ᐱᙳᐊᕈᑎᓄᑦ, ᑕᕐᕆᔭᕐᓗᓯ ᐅᕝᕙᓘᓐᓃᑦ ᓄᓇᒧᙵᐅᖃᑎᖃᕐᓗᑎᑦ.
  • ᐊᔭᐅᕆᕙᒡᓗᑎᑦ ᐊᐃᑉᐸᕇᖕᓂᕐᓂ ᐊᐃᑉᐸᖏᑕ ᐃᓚᖏᓐᓄᑦ, ᐃᓄᑐᖃᕐᓄᑦ ᐊᒻᒪ ᐱᖃᓐᓇᕆᔭᕐᓄᑦ ᐊᕙᓗᔭᐅᓯᒪᐃᓐᓇᖃᑦᑕᕐᓂᐊᕐᒪᑕ ᐃᓄᖕᓂ ᓇᒡᓕᒍᓱᒃᑐᓂᑦ.

5. ᐱᕈᖅᓴᓗᒍ ᕿᑐᙵᕕᑦ ᐃᒻᒥᓂᒃ−ᐃᓱᒪᒋᑦᑎᐊᕐᓂᖓᓂ

ᓱᕈᓯᑦ ᐃᒻᒥᓂᒃ ᐅᐱᒍᓱᑦᑎᐊᕈᑎᒃ ᐃᒥᐊᓗᒋᐅᙱᓐᓂᖅᓴᐅᔪᓐᓇᖅᐳᑦ ᒪᒃᑯᓗᐊᖅᑎᓪᓗᒋᑦ ᐊᑐᕐᓗᑎᒡᓗ ᐃᒥᐊᓗᖕᒥ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᖃᓄᐃᓐᓂᐅᔪᓂᑦ.

ᐅᑯᐊ ᐃᑲᔪᕈᑎᐅᕗᑦ ᕿᑐᙵᕐᓂᑦ ᐃᑲᔪᕐᓂᕐᒧᑦ ᐱᕈᖅᓴᐃᓂᖏᓐᓂ ᐃᒻᒥᓂᒃ ᐅᒃᐱᕈᓱᖕᓂᕐᒥᑦ ᐊᒻᒪ ᐃᒻᒥᓂᒃ−ᐅᐱᒋᑦᑎᐊᕐᓂᕐᒧᑦ:
  • ᐃᓕᓴᖅᓯᕙᒡᓗᑎᑦ ᐱᐅᓂᐅᔪᑦ ᐱᓕᕆᕙᒃᑕᖏᓐᓂ ᐊᒻᒪᓗ ᐅᐱᒍᓗᒍ ᐅᖃᐅᑎᒐᔪᒡᓗᒋᑦ.
  • ᐊᔭᐅᕆᕙᒡᓗᑎᑦ ᐊᐃᑉᐸᕇᖕᓂᑦ ᒪᓕᒍᒥᓇᖅᑐᓄᑦ ᓄᓇᓕᖕᓂ ᐃᓅᓯᖃᖅᑐᓂ ᖃᓄᐃᙱᑦᑎᐊᖅᑐᓂ ᐃᓅᓯᖃᕐᓂᐅᔪᓄᑦ ᐊᒻᒪᓗ ᐱᐅᔪᒧᑦ ᒪᓕᖕᓂᐅᓂᐊᖅᑐᒥᑦ.
  • ᐊᔭᐅᕆᓗᑎᑦ ᐃᓚᐅᖃᑕᐅᓂᕐᒥ ᐃᓕᓐᓂᐊᕐᕕᓂᑦ, ᐱᙳᐊᕐᓂᕐᓄᑦ ᐊᒻᒪᓗ ᓄᓇᓕᖕᓂ ᖃᓄᐃᓕᐅᕐᓂᐅᔪᓄᑦ ᐊᓕᐊᓇᐃᒋᔭᖏᓐᓂ ᐃᓕᑦᑎᓂᐊᕐᒪᑕ ᐊᓕᐊᓇᐃᒍᓱᖕᓂᕐᒥ ᐃᒥᐊᓗᖃᙱᑦᑐᒥᑦ.
  • ᐊᔭᐅᕆᕙᒡᓗᒋᑦ ᐃᓕᖅᑯᓯᒧᑦ ᑲᑎᙵᓂᖃᕐᓂᐅᔪᒥᑦ ᐱᓐᓇᕆᓗᒍ ᐃᓄᐃᖅ ᐱᖅᑯᓯᑐᖃᖏᓐᓂᑦ, ᑲᑎᙵᑎᓂᖃᕐᓗᒋᑦ ᓄᓇᒧᑦ ᐊᒻᒪ ᐃᓕᑦᑎᓂᕐᒧᑦ ᐃᓄᐃᑦ ᐊᔪᙱᓐᓂᖏᓐᓂᑦ.
ᐊᖓᔪᖅᑳᑦ ᐃᓕᓐᓂᐊᖅᑎᑦᑎᔪᓐᓇᖅᐳᑦ ᕿᑯᙵᒥᓂᑦ ᐱᐅᔪᓂ ᑲᒪᒋᔭᖃᑦᑎᐊᕐᓂᕐᒧᑦ ᖃ/ᒧᑎᓐᓂᐅᔪᓂᑦ ᐱᓕᕆᓂᖃᕐᓂᕐᒧᑦ ᐊᒃᓱᕈᕐᓂᐅᔪᓂᑦ ᐊᒻᒪ ᐊᔪᕐᓇᖅᑐᓂᑦ ᖃᓄᐃᓐᓂᐅᔪᓂᑦ ᐃᒥᐊᓗᖕᒥ ᐊᑐᕐᓇᓂ, ᓲᕐᓗ:
  • ᓄᓇᓕᐊᕐᓗᓂ.
  • ᐱᖃᓐᓇᕆᔭᒥᓃᓐᓂᕐᒥᑦ ᐊᒻᒪᓗ ᐃᓚᒥᓐᓂ.
  • ᐃᓄᑑᓗᓂ ᐊᓕᐊᓇᐃᒍᓱᖕᓂᖃᕐᓗᓂ ᐅᖃᓕᒫᕐᓗᓂ ᐅᕝᕙᓘᓐᓃᑦ ᐱᙳᐊᕐᓗᓂ ᖃᕋᓴᐅᔭᒃᑯᑦ ᐱᙳᐊᕈᑎᓂᑦ.
  • ᐱᙳᐊᕐᓂᕐᒥᑦ ᐱᙳᐊᕐᓗᓂ ᐊᓯᖏᓐᓂᓗ ᑲᑎᙵᓂᐅᔪᓂ ᖃᓄᐃᓕᐅᕐᓂᐅᔪᓂᑦ.
  • ᖃᓄᐃᓕᐅᕐᓗᓂ ᓲᕐᓗ ᐊᖑᓇᓱᖕᓂᕐᒥᑦ, ᐃᖃᓗᒐᓱᖕᓂᕐᒥᑦ ᓴᓇᙳᐊᕐᓗᓂ, ᓂᕿᓕᐅᕐᓗᓂ, ᒥᖅᓱᕐᓗᓂ.
  • ᐃᑲᔪᖅᑕᐅᔪᒪᓗᓂ ᐱᔭᕆᐊᖃᓕᕌᖓᑦ ᐊᒻᒪ ᑲᑎᖃᑎᖃᕐᓂᕐᒥᑦ ᐃᓄᖕᓄᑦ ᐃᑲᔪᖅᓱᐃᓲᓄᑦ ᐊᒻᒪ ᐃᓕᖕᓂ ᓇᒡᓕᒍᓱᒃᑐᓄᑦ.
  • ᐱᕈᖅᓴᐃᓂᖅ ᐱᐅᔪᓄᑦ ᐃᓚᒌᑦᑎᐊᕐᓂᕐᒧᑦ ᐃᓚᒌᓄᑦ ᐊᒻᒪ ᐱᖃᓐᓇᕆᔭᕐᓄᑦ ᐊᒻᒪᓗ ᐃᓚᐅᖃᑕᐅᓗᓂ ᓄᓇᓕᖕᓂ ᖃᓄᐃᓐᓂᐅᔪᓂᑦ, ᖃᓄᐃᓕᐅᕐᓂᐅᔪᓂᑦ ᐊᒻᒪᓗ ᖁᕕᐊᓱᒍᑕᐅᔪᓄᑦ.