ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ
 |
ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ ᑭᓇᑐᐃᓐᓇᖅ ᐃᒥᒃᑲᐅᒍᓂ ᐃᒥᐊᓗᖕᒥᑦ ᓱᒃᑲᓴᕐᓗᓂ ᐊᑕᐅᓰᕐᓗᓂ ᐃᒥᕐᓂᐅᔪᒥᑦ. ᑖᓐᓇ ᐃᓄᒃ ᐊᓃᖃᑎᖃᕈᓐᓇᖅᐳᖅ ᐱᖃᓐᓇᕆᔭᒥᓂᑦ, ᐱᙳᐊᕐᓗᑎᒃ ᐃᒥᐊᓗᖕᓂᕐᒧᑦ ᐱᙳᐊᕈᑕᐅᔪᒥᒃ, ᐃᒥᓗᐊᑐᐃᓐᓇᕐᓗᓂᓘᓐᓃᑦ ᐋᖓᔾᔭᒍᒪᖕᒪᑦ. |
ᐅᖃᐅᓯᐅᓂᖓᓂ ᑲᓇᑕᒥ ᐊᑦᑎᒃᑐᒥ−ᐅᓗᕆᐊᓇᕐᓂᖓᓂ ᐃᒥᐊᓗᖕᒥ ᐃᒥᕐᓂᕐᒧᑦ ᒪᓕᒋᐊᓖᑦ, ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ ᐃᒪᐃᑦᑑᕗᖅ:
- ᑕᓪᓕᒪᓂᒃ ᐅᖓᑖᓄᓪᓘᓐᓃᑦ ᐃᒥᖅᑕᐅᔪᓂᒃ ᐊᑕᐅᓰᖅᑐᒥᒃ ᐃᒥᕐᓂᐅᔪᒥᑦ ᐊᖑᑎᓄᑦ
- ᑎᓴᒪᓂᒃ ᐅᖓᑖᓄᓪᓘᓐᓃᑦ ᐃᒥᖅᑕᐅᔪᓂᒃ ᐊᑕᐅᓰᖅᑐᒥᒃ ᐃᒥᕐᓂᐅᔪᒥᑦ ᐊᕐᓄᓄᑦ
ᓱᒃᑲᔪᒥᒃ ᐃᒥᐊᓗᖃᑦᑕᕈᕕᑦ, ᕿᓚᒥᐊᓗᒃ ᐋᖓᔾᔭᓲᖑᕗᑎᑦ. ᑕᐃᒪᐃᑉᐳᖅ ᓱᒃᑲᓂᖅᓴᐅᔪᒥᒃ ᐃᒥᕋᕕᑦ ᑎᒥᕕᑦ ᐊᓂᐊᑎᑦᑎᔪᓐᓇᕐᓂᖓᓂ ᐃᒥᐊᓗᖕᒥᑦ. ᐊᑯᓂᐅᓂᖅᓴᒥᒃ ᐊᑕᐅᓯᕐᒥ ᐃᑲᕐᕋᒥᒃ ᑎᒥᖕᓄᑦ ᓱᕋᑦᑎᔪᓐᓇᕐᓂᖓᓂ ᐊᑕᐅᓯᕐᒥ ᐃᒥᐊᓗᒃᑕᐅᒐᔪᒃᑐᒥᑦ ᐃᒥᐊᓗᖕᒥᑦ. ᓱᓐᓂᐅᒪᔪᓐᓃᕐᓇᖅᑐᑐᐊᖑᔪᖅ ᓄᖅᑲᕐᓂᕐᒥᑦ ᐃᒥᕐᓂᕐᒧᑦ ᐊᒻᒪᓗ ᐅᑕᖅᑭᓗᓂ.
ᖃᓄᐃᒻᒪᑦ ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ ᐅᓗᕆᐊᓇᖅᑐᐊᓘᕙ?
ᓱᒃᑲᔪᒥᒃ ᐃᒥᐊᓗᖃᑦᑕᕐᓂᖅ ᐅᓗᕆᐊᓇᕐᓂᖅᓴᐅᒐᔪᖕᓂᖅᓴᐅᕗᖅ ᐊᓯᖏᓐᓂ ᖃᓄᐃᑦᑑᓂᖏᓐᓂ ᐃᒥᕐᓂᐅᔪᓂᒃ, ᐅᓂᕐᓂᖅᓴᐅᔪᓂ ᐃᒥᐊᓗᖕᓂ ᑭᓇᑐᐃᓐᓇᖅ ᐃᒥᕈᓂ ᐊᑕᐅᓰᖅᑐᒥ, ᐋᓐᓂᕋᔭᖅᑐᒃᓴᐅᔪᓐᓇᕐᓂᖅᓴᐅᖕᒪᑕ ᐊᒻᒪᓗ ᐅᓗᕆᐊᓇᖅᑐᓂᒃ ᐱᓕᕆᓗᑎᒃ. ᓱᓕᕗᖅ, ᐋᖓᔾᔭᓗᐊᕐᓗᓂ ᑐᕌᖅᑎᑦᑎᔪᓐᓇᖅᐳᖅ ᐃᒥᐊᓗᖕᒧᑦ ᑐᖁᓐᓇᖅᑐᑖᕐᓂᕐᒧᑦ ᐊᒻᒪᓗ ᐃᒻᒪᖄ ᑐᖁᓗᓂ. ᑕᐃᒪᐃᑦᑐᓐᓇᖅᐳᖅ ᐃᓄᒃ ᐋᖓᔮᕐᔪᐊᖅᑐᖅ ᖃᐅᔨᒪᔪᓐᓃᖅᐸᑦ, ᒥᕆᐊᕈᓂ ᐊᒻᒪᓗ ᐃᐱᓗᓂ ᒥᕆᐊᒥᓄᑦ.
ᑭᓇᑐᐃᓐᓇᖅ ᓱᒃᑲᓗᐊᖅᑐᒥ ᐃᒥᕈᓂ, ᐊᖏᒡᓕᒋᐊᖅᑐᒧᑦ ᐅᓗᕆᐊᓇᖅᑐᒨᖅᑎᑦᑎᕗᖅ ᐅᑯᓄᖓ:
- ᐅᓇᑕᓕᕐᓂᕐᒧᑦ ᐅᕝᕙᓘᓐᓃᑦ ᖁᓄᔪᕐᓂᐊᖅᑕᐅᓂᕐᒧᑦ.
- ᐊᖏᙱᑦᑐᒥ ᑯᔭᒃᑕᐅᓂᕐᒥᑦ ᐅᓇᑕᖅᓯᓗᓂᑦ ᑯᔭᒡᓗᓂ ᐊᓯᖏᓐᓄᑦ ᐊᖏᖏᑦᑐᓄᑦ.
- ᐱᕙᓪᓕᐊᑎᑦᑎᓂᕐᒥᑦ ᐱᐅᙱᕙᓪᓕᐊᔪᒥᓪᓗ ᓂᑲᓪᓗᖓᓂᕐᒥᑦ, ᖁᓱᓂᕐᒥᑦ ᐊᒻᒪᓗ ᐊᓯᖏᓐᓂ ᐃᓱᒪᒧᑦ ᐋᓐᓂᐊᖃᕐᓇᕐᓂᕐᒧᑦ ᐊᑲᐅᙱᓕᐅᕈᑕᐅᔪᓂᒃ.
- ᖃᐅᔨᒪᔪᓐᓃᖅᐸᖕᓂᖅ, ᐊᓯᐅᔨᓗᑎᑦ ᐃᖅᑲᐅᒪᓂᓕᒫᕐᓂᑦ ᓇᒦᓚᐅᕐᓂᕐᓂ ᐊᒻᒪᓗ ᖃᓄᐃᓕᐅᓚᐅᕐᓂᕐᓂᑦ ᐋᖓᔮᖅᑎᓪᓗᑎᑦ.
- ᐱᙳᕐᔪᐊᕐᓗᑎᑦ ᐃᓚᖃᖅᑐᒥᒃ ᓂᐊᖁᙳᓂᕐᒥᑦ, ᓴᔪᒃᓱᕐᓗᑎᑦ ᐊᒻᒪᓗ ᒥᕆᐊᖅᓴᑲᑕᒡᓗᑎᑦ.
- ᐃᒻᒥᓃᕈᒪᓂᕐᒧᑦ ᕿᒫᓂᐅᔪᒥᒃ ᑲᑕᒃᓯᒪᑎᓪᓗᑎᑦ.
- ᐋᓐᓂᕐᓗᓂ ᑐᖁᑕᐅᓗᓂᓘᓐᓃᑦ ᑲᑕᖕᓂᕐᒧᑦ, ᑭᕕᓂᕐᒧᑦ, ᕿᐊᕐᓂᕐᒧᑦ, ᓯᓚᒦᔅᓲᔭᕐᓗᓂ ᕿᐅᓗᓂ ᐃᑭᑦᑐᒧᓪᓘᓐᓃᑦ.
- ᐋᓐᓂᕐᓗᓂ ᑐᖁᓗᓂᓘᓐᓃᑦ ᓄᓇᒥᑦ, ᐊᐅᓪᓛᖅᓯᒪᓗᓂ ᓯᑭᑑᕐᓗᓂᓘᓐᓃᑦ.
- ᖃᓂᒻᒪᒡᓗᓂ ᐊᒻᒪᓘᓐᓃᑦ ᑐᖁᓗᓂ ᐃᒥᐊᓗᖕᒧᑦ ᑐᖁᓐᓇᖅᑐᖅᑖᕐᓂᕐᒧᑦ.
ᓇᕿᓪᓗᒍ ᐅᕘᓇ ᐃᓕᑦᑎᒃᑲᓐᓂᕐᓂᕐᒧᑦ ᖃᓄᐃᓕᐅᕐᓂᕐᒥᑦ ᑭᓇᑐᐃᓐᓇᖅ ᐋᓐᓂᐊᕈᓂ ᐃᒥᐊᓗᖕᒧᑦ ᑐᖁᓐᓇᖅᑐᖃᓕᕈᓂ.
ᓇᕿᓪᓗᒍ ᐅᕘᓇ ᐃᑲᔪᕈᑎᒃᓴᓄᑦ ᑲᒪᑦᑎᐊᖅᑐᒥᑦ ᐊᒻᒪᓗ ᐊᑦᑕᓇᙱᓐᓂᖅᓴᐅᔪᓄᑦ ᐃᒥᐊᓗᖕᒥ ᐊᑐᕐᓂᕐᒧᑦ.