ᐃᑲᔪᕈᑎᒃᓴᑦ ᐅᖃᓪᓚᖃᑎᖃᕐᓂᕐᒧᑦ ᒪᒃᑯᒃᑐᓄᑦ
ᐱᒻᒪᕆᐅᕗᖅ ᐅᖃᖃᑎᖃᕐᓂᕐᒧᑦ ᓄᑕᖅᑲᓄᑦ ᐃᒥᐊᓘᑉ ᒥᒃᓵᓄᑦ ᓄᑕᕋᐅᑎᓪᓗᒋᑦ. ᐅᖃᓪᓚᖃᑎᖃᕐᓂᕐᒥᑦ ᕿᑐᙵᕐᓄᑦ ᐃᒥᐊᓘᑉ ᒥᒃᓵᓄᑦ ᐃᑲᔪᕐᓂᐊᖅᐳᖅ ᐅᖃᐅᔾᔨᓯᒪᑦᑎᐊᖅᑐᒥ ᐊᒻᒪ ᐊᑦᑕᓇᙱᓐᓂᖅᓴᐅᔪᒥ ᓂᕈᐊᕐᓂᐅᔪᓂᑦ ᐃᒥᐊᓗᖕᒥ ᐊᑐᕐᓂᕐᒧᑦ ᓯᕗᓂᒃᓴᒧᑦ. ᑕᒪᓐᓇ ᐊᔪᕐᓇᓚᐅᑲᒍᓐᓇᖅᑎᓪᓗᒍ, ᐃᖅᑲᐅᒪᓂᐊᖅᐳᑎᑦ ᐃᖏᕐᕋᐃᓐᓇᕐᓂᐅᔪᒥ ᐅᖃᓪᓚᖕᓂᐅᕗᖅ ᐃᓐᓇᕈᖅᐸᓪᓕᐊᑎᓪᓗᒋᑦ ᐊᒻᒪᓗ ᓅᑉᐸᓪᓕᐊᑎᓪᓗᒋᑦ ᐊᔾᔨᒌᙱᑦᑐᓄᑦ ᐱᓕᖅᑭᒃᑕᕐᓂᐅᔪᓂ ᐃᓅᓯᕐᒥᑦ.
ᐅᑯᐊ ᐃᑲᔪᕈᑎᐅᕗᑦ ᐅᖃᓪᓚᖃᑦᑕᕐᓂᕐᒧᑦ ᒪᒃᑯᒃᑐᓄᑦ ᐃᒥᐊᓘᑉ ᒥᒃᓵᓄᑦ:
- ᐅᐃᒪᓇᕐᓂᐅᙱᑦᑐᒥ ᐅᖃᓪᓚᖕᓂᖃᕆᐊᕐᓗᑎᑦ, ᓂᙵᐅᒪᙱᑎᓪᓗᑎᑦ ᐊᑲᖅᓴᒃᓯᒪᙱᑎᓪᓗᑎᓪᓗ ᖃᓄᐃᓕᐅᕐᓂᕆᔭᕕᓂᖓᓐᓂ. ᐃᒥᐊᓗᒃᑐᕕᓂᐅᒍᑎᒃ, ᑭᖑᕙᕆᐊᕐᓗᒍ ᐅᖃᓪᓚᖕᓂᕆᔭᐃᑦ ᑭᓯᐊᓂ ᐃᒃᐱᖕᓂᐊᓂᖃᕈᓐᓃᖅᐸᑕ ᐊᒃᑐᐃᓂᐅᔪᓂᑦ ᐃᒥᐊᓗᖕᒧᑦ.
- ᐃᓕᑦᑎᓗᑎᑦ ᖃᓄᖅ ᐃᒥᐊᓗᒃ ᐊᒃᑐᐃᓲᖑᓂᖏᓐᓂ ᓱᕈᓯᕐᓂᑦ ᐊᒻᒪ ᒪᒃᑯᒃᑐᓂᑦ. ᑎᒥᖏᑦ ᐃᓱᒪᖏᓪᓗ ᓱᓕ ᐱᕙᓪᓕᐊᖕᒪᑕ, ᐅᓗᕆᐊᓇᕐᓂᖅᓴᒦᑉᐳᑦ ᐃᓐᓇᕐᓂᑦ. ᖃᐅᔨᒋᐊᒃᑲᓐᓂᕆᑦ ᐅᕙᓂ.
- ᑕᑯᒃᓴᐅᑎᑦᑎᓗᓂ ᐃᓅᖃᑎᒌᑦᑎᐊᕐᓂᕐᒥᑦ − ᐃᓄᐃᑦ ᐃᓅᖃᑎᒌᑦᑎᐊᕐᓂᕐᒥᑦ ᐱᓐᓇᕆᔭᐅᔪᒥ ᐃᒃᐱᒍᓱᑦᑎᐊᕐᓂᕐᒥᑦ ᐊᓯᒥᓂᑦ, ᐃᓚᖃᓂᕐᒧᑦ ᐊᒻᒪᓗ ᐸᖅᑭᓂᖅ ᐃᓄᖕᓄᑦ − ᖃᐅᔨᒪᑎᓪᓗᒋᑦ ᐃᒃᐱᒍᓱᖕᓂᖏᑦ ᐃᒃᐱᒋᔭᐅᑦᑎᐊᕐᓂᖏᓐᓂ.
- ᓈᓚᒡᓗᑎᑦ ᐊᒻᒪᓗ ᐊᔭᐅᕆᓗᒋᑦ ᓱᓕᑦᑎᐊᕐᓗᑎᒃ ᐅᖃᓪᓚᖕᓂᕐᒧᑦ ᖃᓄᐃᑉᐸᓪᓕᐊᓂᖏᓐᓂ ᐃᓅᓯᖓᓐᓂ, ᐊᒻᒪᓗ ᐊᑐᕐᓂᑯᖏᓐᓂ ᐃᒥᐊᓗᖃᑦᑕᖅᑎᓪᓗᒋᑦ. ᐅᓂᒃᑳᐅᓯᒃᓴᖃᖅᐳᑦ ᓇᖕᒥᓂᖅ ᑐᓴᖅᑕᐅᓪᓗᐊᖅᑐᓂᑦ.
- ᑲᑉᐱᐊᓵᖅᑕᐃᓕᓗᒋᑦ ᓱᓕᓗᐊᙱᑦᑐᓂ ᐅᓂᒃᑳᖅᑐᐊᓂ ᐅᓗᕆᐊᓇᕐᓂᐅᔪᓂᑦ ᐃᒥᐊᓗᖕᒥᑦ. ᑐᓂᓯᓗᑎᒃ ᓱᓕᓂᐅᔪᓂᑦ ᑐᑭᓯᓇᑦᑎᐊᖅᑎᑦᑎᓇᓱᐊᕐᓗᑎᒃ, ᐃᓚᖃᕐᓗᓂ ᐱᓕᕆᓂᐅᔪᓂᑦ ᒥᒃᖠᒋᐊᖅᑎᑦᑎᓂᕐᒧᑦ ᐃᕐᙲᓐᓇᑲᐅᑎᒋ ᐊᒻᒪᓗ ᐊᑯᓂᐅᔪᒃᑯᑦ ᐊᒃᑐᕐᓂᕐᓗᒃᑎᑦᑎᓂᐅᔪᓂᑦ.
- ᐸᓯᒃᖠᕋᓱᐊᖅᑕᐃᓕᓗᑎᑦ. ᒪᒃᑯᒃᑐᖁᑎᑎᑦ ᐃᒥᐊᓗᖕᓂᖅᐸᑕ, ᐱᐅᙱᑎᓐᓇᓱᐊᕐᓗᒋᑦ ᖃᙳᓱᒃᑎᓐᓇᓱᐊᕐᓇᒋᓪᓗ. ᖃᐅᔨᒪᑎᓪᓗᒋᑦ ᓇᒡᓕᒋᓂᕐᓂ ᖃᓄᑐᐃᓐᓇᑦᑎᐊᖅ, ᑭᓯᐊᓂ ᑐᑭᓯᔪᒪᓂᕐᓂ ᖃᓄᐃᒻᒪᑦ ᐃᒥᐊᓗᖕᓂᖏᓐᓂ ᐊᒻᒪᓗ ᐃᑲᔪᕐᓗᒋᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐃᒥᕈᑎᒃ.
ᐃᖅᑲᐅᒪᓗᑎᑦ ᖃᓄᐃᙱᓐᓂᖓᓂ ᖃᐅᔨᒪᙱᒃᑲᓗᐊᕈᕕᑦ ᑭᐅᔾᔪᑕᐅᔪᓂᑦ. ᑭᓱᑐᐃᓐᓇᒥᒃ ᖃᐅᔨᒪᙱᒃᑯᕕᑦ, ᖃᐅᔨᑎᓪᓗᒋᑦ ᖃᐅᔨᒋᐊᕐᓂᐊᕐᓂᕐᓂᑦ ᐊᒻᒪᓗ ᐅᖃᐅᑎᓂᐊᖅᐸᑎᑦ. ᐱᒻᒪᕆᐅᕗᖅ ᐅᖃᓪᓚᖕᓂᖃᑐᐃᓐᓇᕐᓂᕐᒧᑦ.