ᐃᒥᐊᓗᖕᒥ ᐊᑐᕐᓂᕐᒧᑦ ᓄᓇᕗᒻᒥ
ᐃᒥᐊᓗᒃ ᐃᓚᒋᔭᐅᖏᓐᓇᐅᔭᖅᓯᒪᙱᓚᖅ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖓᓐᓂ. ᐃᒻᒪᖄ, ᐊᒥᓱᑦ ᐃᓄᐃᑦ ᖃᐅᔨᑎᑕᐅᓚᐅᖅᓯᒪᕗᑦ ᐃᒥᐊᓗᖕᒧᑦ ᓅᑎᓪᓗᒋᑦ ᓄᓇᓕᒋᔭᐅᓂᐊᖅᑐᓄᑦ.
ᑕᒪᓐᓇ ᓅᓐᓂᐅᔪᖅ ᐱᖅᑯᓯᑐᖃᖅᑎᒍᑦ ᐃᓅᓯᐅᔪᒥ ᒫᓐᓇᐅᔪᒧᑦ ᐃᓅᖃᑎᒌᖕᓂᐅᔪᒥ ᐊᖏᔪᐊᓗᖕᒥ ᐊᒃᑐᐃᓂᖃᖅᐳᖅ ᐋᓐᓂᐊᖃᕐᓇᙱᓐᓂᕐᒧᑦ ᐊᒻᒪᓗ ᖃᓄᐃᙱᑦᑎᐊᕐᓂᐅᔪᒥ ᐃᓄᑐᐃᓐᓇᕐᓄᑦ, ᐃᓚᒌᓄᑦ ᐊᒻᒪᓗ ᓄᓇᓕᐅᔪᓂᑦ, ᐊᖏᒡᓕᒋᐊᕐᓂᖃᖅᖢᓂ ᐅᑯᓇᓂ:
- ᐊᔪᖅᓴᕐᓂᕐᒧᑦ
- ᓂᕿᑦᑎᐊᕙᖃᙱᓐᓂᕐᒧᑦ
- ᐊᑦᑎᖕᓂᖅᓴᓂ ᐃᓕᓐᓂᐊᕐᓂᖏᓐᓄᑦ ᑭᒡᓕᐅᔪᓄᑦ
- ᐃᖅᑲᓇᐃᔮᒃᓴᖃᙱᓐᓂᕐᒧᑦ
- ᐃᒡᓗᕐᓘᑎᖃᕐᓂᕐᒧᑦ ᐊᒻᒪᓗ ᐃᓄᒋᐊᓗᐊᕐᓂᐅᔪᓄᑦ
- ᐃᓚᒌᖑᔪᓄᑦ ᐊᑲᐅᙱᓕᐅᕈᑕᐅᔪᓂᑦ, ᐋᓐᓂᖅᓯᕆᓂᕐᒧᑦ ᐊᒻᒪᓗ ᐱᑦᑎᐊᖃᑦᑕᐅᑎᙱᓐᓂᐅᔪᒥᑦ
- ᐃᒻᒥᒃᑯᑦ ᐊᒻᒪᓗ ᓄᓇᓕᖕᓂ ᓱᔪᐃᓂᐅᔪᑦ
ᐃᓄᐃᑦ ᑲᒪᒋᔭᖃᕋᓱᐊᖅᑎᓪᓗᒋᑦ ᓱᔪᐃᓂᐅᔪᓂᑦ ᐊᓯᔾᔨᖅᐸᓪᓕᐊᓂᐅᔪᓄᑦ ᐱᖅᑯᓯᑐᖃᖏᓐᓂᑦ ᐊᒻᒪᓗ ᐃᓅᓯᖏᓐᓂ, ᐃᓚᖏᑦ ᐃᓄᐃᑦ ᓴᖑᓚᐅᖅᐳᑦ ᐃᒥᐊᓗᖕᒧᑦ ᑲᒪᒋᔭᖃᕋᓱᐊᖅᑎᓪᓗᒋᑦ ᐊᒻᒪ ᐊᐅᓚᑦᑎᓂᕐᒧᑦ ᐊᒃᓱᕈᕐᓂᐅᔪᓂᑦ. ᐃᓚᖏᓐᓄᑦ ᐃᓄᖕᓄᑦ, ᐃᒥᐊᓗᒃ ᐃᑲᔪᕈᑕᐅᓲᖑᕗᖅ ᑲᒪᒋᔭᖃᕐᓂᕐᒧᑦ ᓱᔪᐃᓂᐅᔪᓄᑦ ᐊᑐᕐᓂᑯᖏᓐᓂ, ᐅᒡᒍᐊᕐᓂᕐᒧᑦ, ᓂᙵᐅᒪᓂᕐᒧᑦ, ᐋᓐᓂᖅᓯᖅᑕᐅᓂᕐᒧᑦ ᐊᒻᒪᓗ ᐱᑦᑎᐊᖅᑕᐅᙱᓐᓂᕐᒧᑦ. ᐃᒥᐊᓗᒃ ᑲᑎᙵᓂᖃᖅᖢᓂ ᐅᑯᓇᓂ ᐊᑐᖅᑕᐅᓂᑯᓂ ᐊᔪᕐᓇᖅᑎᑦᑎᔪᓐᓇᖅᐳᖅ ᐊᐅᓚᑦᑎᐊᕐᓂᕐᒧᑦ ᐊᒻᒪᓗ ᐃᓅᓯᐅᑉ ᖃᓄᐃᓐᓂᐅᔪᓂ ᐊᔪᕐᓇᕆᐊᓪᓚᒃᑎᑦᑎᓪᓗᓂ.
ᐅᓪᓗᒥ, ᐃᒥᐊᓗᓗᐊᖃᑦᑕᕐᓂᖅ ᐱᑕᖃᒐᔪᒃᐳᖅ ᐊᒥᓱᓂ ᓄᓇᕗᒻᒥ ᓄᓇᓕᐅᔪᓂᑦ, ᐅᒡᒍᐊᕐᓇᕐᔪᖅᑐᐊᓂ ᐊᒃᑐᐃᓂᖃᒐᔪᒃᖢᓂ ᐃᓄᑐᐃᓐᓇᕐᓄᑦ, ᐃᓚᒌᓄᑦ ᐊᒻᒪᓗ ᓄᓇᓕᖕᓄᑦ. ᑕᒪᒃᑯᐊ ᐃᓚᖃᖅᐳᑦ ᐋᓐᓂᕐᓂᐅᔪᓂ ᐱᕐᕈᓗᐊᕿᓂᐅᔪᓂᑦ ᐊᒻᒪᓗ ᐋᓐᓂᖅᓯᕆᓂᕐᓄᑦ, ᓂᑲᓪᓗᖓᓂᖅ ᐊᒻᒪ ᐃᒻᒥᓃᕐᓂᖅ, ᐃᓚᒌᓄᑦ ᐊᑲᐅᙱᓕᐅᕈᑕᐅᔪᓄᑦ, ᖁᓄᔪᓐᓂᐊᕐᓂᖅ, ᓯᖓᐃᑦᑎᐊᙱᓐᓂᑦ ᖃᓄᐃᓐᓂᐅᔪᓄᑦ ᐊᒻᒪ ᓯᖓᐃᔭᐅᑎᓪᓗᒍ ᐋᖓᔮᖃᑦᑕᕐᓂᕐᒧᑦ ᐊᒃᑐᖅᑕᐅᓯᒪᔪᓄᑦ (FASD).
ᐊᒥᓱᐊᓗᖕᓂ ᐱᔾᔪᑎᑕᖃᖅᑎᓪᓗᒍ ᖃᓄᐃᒻᒪᑦ ᐃᓄᐃᑦ ᐃᒥᐊᓗᖕᒥ ᐊᑐᓲᖑᓂᖏᓐᓂ ᐃᓅᓇᓱᐊᕐᓂᕐᒧᑦ, ᐃᔨᖅᓯᒪᓂᐅᒐᔪᒃᐳᖅ ᐋᓐᓂᐊᕐᓂᐅᔪᒥᑦ. ᐱᒻᒪᕆᐅᕗᖅ ᑐᑭᓯᐅᒪᓂᕐᒧᑦ ᐃᓚᖏᑦ ᓄᓇᕗᒻᒥᐅᑦ ᐃᒥᐊᓗᖕᒥ ᐊᑐᓲᖑᓂᖏᓐᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ, ᑭᓯᐊᓂ ᐱᒻᒪᕆᐅᒋᕗᖅ ᐸᓯᒃᖠᖏᓐᓂᕐᒥᑦ ᑕᐃᒃᑯᓄᖓ ᐊᒃᓱᕈᖅᑐᓄᑦ ᐃᒥᐊᓗᖕᒧᑦ, ᐊᒻᒪᓗ ᐃᓕᓴᖅᓯᓂᕐᒥ ᐊᑐᕐᓂᑯᕕᓂᖏᓐᓂ ᐋᖅᑭᒃᓱᐃᓯᒪᓂᖏᓐᓂ ᐃᓅᓯᖏᓐᓂᑦ.
ᐃᒥᐊᓗᕐᔪᐊᖃᑦᑕᕐᓂᕐᒧᑦ ᐊᒃᑐᐃᓲᖑᕗᖅ ᑭᒃᑯᓕᒫᓂᑦ, ᐊᒻᒪᓗ ᓄᓇᕗᒻᒥᐅᑦ ᖃᓄᐃᓕᐅᕈᑎᖃᕈᒪᕗᑦ ᒥᒃᖠᒋᐊᖅᑎᑦᑎᓂᕐᒧᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐱᑎᑕᐅᔪᒧᑦ ᐃᒥᐊᓗᖕᒧᑦ. ᒐᕙᒪᒃᑯᑦ, ᕼᐋᒻᓚᐅᔪᑦ, ᐃᓄᐃᑦ ᑲᑐᔾᔨᖃᑎᒌᖑᔪᑦ, ᐃᒥᐊᓗᓕᕆᔨᒃᑯᑦ ᑲᑎᒪᔨᕋᓛᑦ ᐊᒻᒪ ᐊᓯᖏᑦ ᓄᓇᓕᖕᓂ ᐱᓕᕆᖃᑎᒋᔭᐅᔪᑦ ᐱᓕᕆᖃᑎᒌᒃᐳᑦ ᐊᔭᐅᕆᓂᕐᒧᑦ ᑲᒪᒋᔭᖃᑦᑎᐊᖅᑐᒥ ᐊᒻᒪ ᐊᑦᑕᓇᙱᓐᓂᖅᓴᓂ ᓂᕈᐊᒐᓂᑦ ᐃᒥᐊᓘᑉ ᐊᑐᖅᑕᐅᕙᖕᓂᖓᓂ ᒥᒃᖠᒋᐊᖅᑎᑦᑎᓂᕐᒧᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐊᒻᒪ ᓴᐳᔾᔨᓯᒪᓂᕐᒧᑦ ᐋᓐᓂᐊᖃᕐᓇᙱᓐᓂᖓᓂ, ᐊᑦᑕᓇᙱᓐᓂᖓᓂ ᐊᒻᒪᓗ ᐃᓅᓯᐅᑉ ᐱᐅᓂᖓᓂ ᑭᒃᑯᓕᒫᓄᑦ.