ᐃᒥᖅᓯᒪᓪᓗᓂ ᐊᒻᒪᓗ ᐊᖁᓐᓂᖅ
ᓱᓐᓂᐅᒪᓪᓗᑎᒃ ᐅᕝᕙᓘᓐᓃᑦ ᐋᖓᔮᖅᖢᑎᒃ ᐊᖁᓐᓂᖅ ᐱᔾᔪᑎᓪᓗᐊᑕᐅᕗᖅ ᐱᕋᔭᖕᓂᕐᒧᑦ ᑐᖁᑦᑎᓂᐅᔪᒥᒃ ᑲᓇᑕᒥ. ᑭᓇᑐᐃᓐᓇᖅ ᐃᒥᐊᓗᖕᒥ ᐃᒥᖅᑐᕕᓂᐅᒍᓂ, ᐊᑦᑕᓇᖅᐳᖅ ᐊᖁᓐᓂᕐᒧᑦ ᖃᓄᐃᑦᑐᑐᐃᓐᓇᕐᒥ ᐃᖏᕐᕋᔾᔪᑎᐅᔪᒥᒃ, ᐃᓚᖃᖅᖢᓂ ᓄᓇᓯᐅᑎᓂᒃ, ᓯᑭᑑᓂᒃ, ᑎᓴᒪᓕᖕᓂ, ᐊᒻᒪ ᐅᒥᐊᕐᓂᑦ. ᑭᓇᑐᐃᓐᓇᖅ ᐃᒥᕈᓂ ᐊᒻᒪᓗ ᐊᖁᒃᑯᓂ ᐊᐳᖅᓯᓂᖃᕈᓐᓇᕐᓂᖅᓴᐅᕗᖅ. ᐃᒥᖅᑐᕕᓂᐅᓗᓂ ᐊᒻᒪᓗ ᐊᖁᓐᓂᖅ ᑲᑉᐱᐊᓇᑐᐃᓐᓇᙱᓚᖅ ᐊᖁᑎᐅᔪᒧᑦ, ᐊᓯᖏᓐᓂᖅᑕᐅᖅ ᐅᓗᕆᐊᓇᖅᑐᒧᐊᕆᑎᑦᑎᕗᖅ, ᓲᕐᓗ ᐃᑭᒪᔪᓄᑦ ᐃᓄᐃᓪᓗ ᓯᓚᑖᓃᑦᑐᓂᒃ ᓄᓇᓯᐅᒻᒥ ᐊᐳᖅᑐᖃᕐᓂᖅᐸᑦ.
ᖃᓄᖅ ᐃᒥᐊᓗᒃ ᐊᒃᑐᐃᓲᖑᕙ ᐊᖁᑦᑐᓐᓇᕐᓂᓐᓂ?
ᒥᑭᑦᑐᒥᒡᓘᓐᓃᑦ ᐃᒥᕈᕕᑦ ᐃᒥᐊᓗᖕᒥ ᑲᑉᐱᐊᓇᕈᓐᓇᖅᐳᖅ. ᐱᑕᖃᙱᑦᑐᖅ ᐊᑦᑕᓇᙱᑦᑐᒥᒃ ᐃᒥᕐᓗᓂ ᐃᒥᐊᓗᖕᒥ ᐊᖁᓐᓂᐊᕈᕕᑦ. ᐃᒪᐃᒻᒪᑦ ᓇᓗᓇᑦᑎᐊᕐᒪᑦ ᑕᒪᕐᒥᒃ ᐃᒥᐊᓗᒃ ᑎᒥᖕᓃᑦᑐᓐᓃᕐᓂᖓᓂ. ᐊᒻᒪᓗ ᐅᓄᕐᓂᖅᓴᐅᔪᓂ ᐃᒥᕈᕕᑦ ᖁᑦᑎᖕᓂᖅᓴᐅᓂᐊᖅᐳᖅ ᐊᐅᑉ ᐃᒥᐊᓗᓕᖕᒥ ᑭᒡᓕᖓ, ᐊᒻᒪᓗ ᐊᖏᓂᖅᓴᐅᓂᐊᖅᐳᖅ ᐅᓗᕆᐊᓇᕐᓂᖓ ᐱᕐᕈᓗᐊᕿᔪᓐᓇᕐᓂᕐᒧᑦ.
ᐃᒥᐊᓗᒃ ᐊᒻᒪ ᐊᖁᓐᓂᖅ ᑲᑉᐱᐊᓇᖅᑑᓪᓗᓂ ᑲᑎᙵᓂᐅᕗᖅ. ᐃᒥᐊᓗᒃ ᓱᒃᑲᐃᒃᑎᒋᐊᖅᑎᑦᑎᓲᖑᕗᖅ ᖃᕋᓴᕕᑦ ᐃᓚᖓᓐᓂ ᐊᒻᒪᓗ ᐃᒪᐃᑦᑐᓐᓇᖅᐳᖅ:
- ᒥᒃᖠᒋᐊᖅᑎᑦᑎᓗᓂ ᐱᔪᓐᓇᕐᓂᕐᓂ ᖃᓄᐃᓕᐅᑲᐅᖅᑐᕐᓂᕐᒥᑦ ᓂᕆᐅᓇᙱᑦᑐᒥ ᖃᓄᐃᑦᑐᖃᕐᓂᖅᐸᑦ
- ᐊᒃᑐᐃᓗᓂ ᑕᐅᑐᑦᑎᐊᕈᓐᓇᕐᓂᕐᓂ ᐊᒻᒪᓗ ᒥᒃᖠᒋᐊᖅᑎᑦᑎᓗᓂ ᐱᔪᓐᓇᕐᓂᕐᓂ ᖃᓄᑎᒋ ᓄᓇᓯᐅᑏᑦ ᐅᖓᓯᖕᓂᖏᓐᓂ ᐊᓯᖏᓐᓂ ᓄᓇᓯᐅᑎᓂᑦ ᑭᓱᑐᐃᓐᓇᓂᓪᓗ
- ᐊᑦᑎᒃᓯᒋᐊᕐᓗᓂ ᐱᔪᓐᓇᕐᓂᕐᓂ ᐃᓱᒪᑦᑎᐊᕈᓐᓇᕐᓂᕐᒧᑦ ᐊᒻᒪᓗ ᐃᓱᒪᓕᐅᕆᑦᑎᐊᕆᓂᕐᒧᑦ
- ᐊᖏᒡᓕᒋᐊᖅᑐᒥᒃ ᐅᓗᕆᐊᓇᖅᑐᓂᒃ ᐊᒻᒪᓗ ᑲᑉᐱᐊᓇᖅᑐᓂ ᐃᓕᖅᑯᓯᖃᕐᓂᐅᔪᒥᒃ
ᐃᒥᐊᓗᖕᒥ ᐃᒥᕐᓂᐊᕈᕕᑦ, ᐃᖏᕐᕋᔾᔪᑎᒥᒃ ᐊᖁᑦᑕᐃᓕᒋᑦ, ᐊᒻᒪᓗ ᐸᕐᓇᒃᐸᒌᖅᓯᒪᕙᒡᓗᑎᑦ ᐊᖏᕐᕋᑦᑎᐊᕈᓐᓇᕐᓂᐊᕐᓂᕐᓄᑦ. ᐊᓯᐊᒍᑦ ᓇᓂᓯᓗᑎᑦ ᐊᖏᕐᕋᕐᓂᕐᒧᑦ, ᓲᕐᓗ ᐃᑭᒪᓗᑎᑦ ᐱᖃᓐᓇᕆᔭᕐᓂ ᐃᒥᐊᓗᔾᔮᙱᑦᑐᒥ ᐅᕝᕙᓘᓐᓃᑦ ᖃᐃᖁᔨᓗᑎᑦ ᐱᖃᓐᓇᕆᔭᒥ ᐅᕝᕙᓘᓐᓃᑦ ᐃᓚᒋᔭᕐᓂ ᐊᐅᔭᐅᔪᒪᓗᑎᑦ.
ᑭᓲᕙᑦ ᐃᒥᖅᓯᒪᓪᓗᓂ ᐊᒻᒪᓗ ᐊᖁᓐᓂᕐᒧᑦ ᒪᓕᒐᐅᕙᑦ ᓄᓇᕗᒻᒥ?
ᓄᓇᕗᒻᒥ, ᐱᕋᔭᖕᓂᐅᕗᖅ ᑭᓇᑐᐃᓐᓇᒥᒃ ᐊᖁᓐᓂᕐᒧᑦ ᐊᐅᑉ ᐃᒥᐊᓗᓕᖕᒥ ᑭᒡᓕᖃᕐᓗᓂ ᖁᑦᑎᖕᓂᖅᓴᐅᔪᒥᒃ 0.05%-ᒥᑦ. ᐅᕙᓂ ᑕᐃᒪᐃᑦᑐᒥᒃ, ᐸᓖᓯ ᓄᖅᑲᖅᑎᑦᑎᑐᐃᓐᓇᕆᐊᖃᖅᐳᖅ ᓚᐃᓴᓐᓯᖕᓂᑦ ᐃᑲᕐᕋᓄᑦ 24−ᓄᑦ.
ᐊᖁᓪᓗᓂ ᐊᐅᑉ ᐃᒥᐊᓗᓕᖕᒥ ᑭᒡᓕᖓᓂ ᐅᖓᑖᓅᖅᑐᒧᑦ 0.08%−ᒥᑦ ᒐᕙᒪᑐᖃᒃᑯᓐᓂ ᐱᕋᔭᖕᓂᐅᕗᖅ ᐅᕘᓇ ᒐᕙᒪᑐᖃᖅᑎᒍᑦ ᐱᕋᔭᖕᓂᕐᒧᑦ ᓇᓗᓇᐃᒃᑯᑕᖓᓐᓂ ᑲᓇᑕᒥ. ᑕᕝᕙᓂ ᖃᓄᐃᓐᓂᐅᔪᒥᒃ, ᐃᓄᒃ ᐸᓯᔭᐅᔪᒥᒃ ᐋᖓᔮᕐᓗᓂ ᐊᖁᓐᓂᖓᓂ, ᐃᓚᖃᕐᓗᓂ ᐱᔪᒪᙱᓐᓂᐅᔪᒥᒃ ᐋᖓᔮᙱᒃᑲᓗᐊᕈᓂ ᖃᐅᔨᓴᕈᑎᒥᒃ (ᖃᐅᔨᓇᓱᐊᕐᓂᖓᓂ ᖃᓄᑎᒋ ᐋᖓᔮᕐᓂᖓᓂ), ᓵᙵᔪᓐᓇᖅᐳᖅ ᖄᒃᑲᓐᓂᐊᒍᑦ ᐱᕋᔭᖕᓂᐅᔪᓂ ᐃᖅᑲᖅᑐᒐᒃᓴᐅᓂᐅᔪᓂᑦ ᓲᕐᓗ ᐊᑭᓖᑎᑕᐅᓇᔭᕐᓂᖓᓂ, ᐊᓄᓪᓚᒃᓯᕐᓂᕐᒧᑦ ᐃᖅᑲᖅᑐᖅᑕᐅᓂᖓᓂ, ᐱᕋᔭᒃᑕᐃᓕᒪᓂᕐᒧᑦ ᐊᒻᒪᓗ ᑲᓇᑎᓕᒫᒥᒃ ᐊᖁᑦᑐᓐᓇᐃᓪᓕᓂᐅᔪᒥᒃ.
ᒥᑭᓛᖓᓂ ᐃᖅᑲᖅᑐᖅᑕᐅᓂᖓᓄᑦ ᐊᖁᓪᓗᓂ ᐊᐅᑉ ᐃᒥᐊᓗᓕᖕᒥ ᑭᒡᓕᖓᓂ ᐅᖓᑖᓅᖅᑐᒧᑦ 0.08%−ᒥᑦ ᐅᑯᐊᖑᕗᑦ:
- $1000−ᒥ ᐊᑭᓖᔭᕆᐊᖃᖅᑎᑕᐅᓗᓂ ᐊᒻᒪᓗ ᑕᖅᑭᓄᑦ 12−ᓄᑦ ᐊᖁᑦᑕᕆᐊᖃᙱᓐᓂᐅᔪᒥᒃ ᓯᕗᓪᓕᖅᐹᒧᑦ ᐃᖅᑲᖅᑐᖅᑕᐅᓂᖓᓄᑦ.
- ᐅᓪᓗᓄᑦ−30−ᓄᑦ ᑎᒍᔭᐅᓯᒪᑎᑕᐅᓗᓂ ᐊᒻᒪᓗ ᑕᖅᑭᓄᑦ 24−ᓄᑦ ᐊᖁᑦᑕᕆᐊᖃᙱᓐᓂᐅᔪᒥᒃ ᒪᕐᕈᖓᓂ ᐃᖅᑲᖅᑐᖅᑕᐅᓂᖓᓄᑦ.
- ᐅᓪᓗᓄᑦ−120−ᓄᑦ ᑎᒍᔭᐅᓯᒪᑎᑕᐅᓗᓂ ᐊᒻᒪᓗ ᑕᖅᑭᓄᑦ 36−ᓄᑦ ᐊᖁᑦᑕᕆᐊᖃᙱᓐᓂᐅᔪᒥᒃ ᐱᖓᔪᖓᓐᓄᑦ ᐊᒻᒪᓗ ᒪᓕᒃᑐᓄᑦ ᐃᖅᑲᖅᑐᖅᑕᐅᓂᖓᓄᑦ.
ᐃᖅᑲᖅᑐᒐᒃᓴᐅᓂᖓᓂ ᐋᖓᔮᕐᓗᓂ ᐊᖁᓐᓂᕐᒧᑦ ᐱᑎᑦᑎᔪᓐᓇᕆᕗᖅ ᖃᖓᑐᐃᓐᓇᑦᑎᐊᖅ ᐃᓅᑉ ᐱᔪᓐᓇᕐᓂᖓᓂ ᐊᖁᓐᓂᕐᒧᑦ ᐃᖏᕐᕋᔾᔪᑎᒥᒃ (ᓄᓇᓯᐅᒻᒥᒃ, ᐅᒥᐊᖅ, ᓯᑭᑑᖅ, ᑎᓴᒪᓕᒃ) ᐊᒃᑐᖅᑕᐅᓂᖓᓂ ᐃᒥᐊᓗᖕᒧᑦ ᓱᐴᖅᑐᒐᕐᓂᓪᓘᓐᓃᑦ.