ᖃᓄᖅ ᐅᖃᓪᓚᖕᓂᕐᒧᑦ ᐱᒋᐊᖅᑎᑦᑎᓂᖓᓄᑦ
ᐅᖃᓪᓚᖃᑎᖃᕐᓂᖅ ᓄᑕᖅᑲᓂᑦ ᐃᒥᐊᓘᑉ ᒥᒃᓵᓄᑦ ᐊᒃᓱᕈᕐᓇᕈᓐᓇᖅᐳᖅ, ᑭᓯᐊᓂ ᐅᑯᐊ ᖃᐅᑕᒫᒥ ᖃᓄᐃᓐᓂᐅᔪᓂ ᐱᒋᐊᕈᑕᐅᔪᓐᓇᖅᑐᓂ ᐅᖃᓪᓚᖕᓂᐅᔪᒧᑦ:
ᓂᕆᖃᑎᒌᒃᑎᓪᓗᑎᒃ
- ᐅᖃᖃᑎᖃᕐᓗᑎᑦ ᐱᖅᑯᓯᑐᖃᖅᑎᑐᑦ ᐱᓕᕆᓂᐅᔪᓂᑦ, ᐊᒻᒪᓗ ᖃᓄᖅ ᐃᒥᐊᓗᒃ ᐃᓚᒋᔭᐅᓚᐅᖅᓯᒪᓪᓚᕆᙱᓐᓂᖓᓂ ᐃᓄᐃᑦ ᐃᓕᖅᑯᓯᖓᓐᓂ.
- ᐅᖃᖃᑎᖃᕐᓗᑎᒃ ᐃᓚᒌᑦ ᒪᓕᒐᖏᓐᓂ ᐃᒥᐊᓗᒃᑐᖃᑦᑕᕐᓂᕐᒧᑦ. ᐃᒥᐊᓗᒃᑕᖃᕆᐊᖃᙱᒃᑯᓂ ᐊᖏᕐᕋᕐᓂᑦ, ᐃᓱᒪᒋᔭᑎᑦ ᐅᖃᐅᓯᕆᓗᒋᑦ ᐊᒻᒪᓗ ᐱᓐᓇᕆᓂᕆᔭᑎᑦ ᐆᒧᖓ ᓂᕈᐊᒐᐅᔪᒥᑦ.
- ᐅᖃᐅᓯᕆᓗᒍ ᖃᓄᖅ ᐃᓚᖏᑦ ᐃᓄᐃᑦ ᐃᒥᐊᓗᓲᖑᓂᖏᓐᓂ ᓂᕆᖃᑎᒌᒃᑎᓪᓗᑎᒃ ᐃᓅᖃᑎᒌᒃᑎᓪᓗᒋᓪᓗ. ᐅᓂᒃᑲᐅᑎᓗᒋᑦ ᑭᓯᐊᓂ ᐃᓄᐃᑦ ᐃᒥᐊᓗᓗᐊᖅᑎᓪᓗᒋᑦ, ᖃᓂᒻᒪᒍᓐᓇᕐᓂᖏᓐᓂ, ᐋᓐᓂᕐᓗᑎᒃ ᐊᒻᒪᓗ ᐊᒃᑐᕐᓂᕐᓗᒃᑎᑦᑎᓂᖃᕈᓐᓇᕐᓂᖏᓐᓂ ᐊᓯᖏᓐᓄᑦ.
- ᐅᖃᐅᓯᕆᓗᒍ ᐱᒻᒪᕆᐅᓂᖓᓂ ᓂᕆᓂᕐᒥ ᐃᒥᐊᓗᒃᑎᓪᓗᒋᑦ, ᐃᓄᐃᑦ ᐃᒃᐱᒍᓱᒃᓴᕋᐃᓐᓂᖅᓴᐅᓲᖑᖕᒪᑕ ᐊᒃᑐᐃᓂᐅᔪᓂᑦ ᓂᕆᓯᒪᙱᑎᓪᓗᒋᑦ.
ᑕᓚᕖᓴᕐᓂᖅ ᑕᕐᕆᔭᕐᓗᓂᓘᓐᓃᑦ ᐃᓄᙳᐊᖏᑦ ᐋᖓᔮᖅᑑᔮᖅᑎᓪᓗᒋᑦ
- ᐅᖃᐅᓯᖃᕐᓗᑎᑦ ᖃᓄᖅ ᐃᒥᐊᓗᒃ ᐊᒃᑐᐃᓂᖓᓂ ᐃᓕᖅᑯᓯᖃᕐᕕᒋᔭᖓᓐᓂ ᐃᓄᙳᐊᖓᓂ. ᐆᒃᑑᑎᒋᓗᒍ ᑕᑯᑎᑦᑎᓂᕐᒧᑦ ᖃᓄᖅ ᐃᒥᐊᓗᓗᐊᕐᓂᖅ ᐱᑎᑦᑎᔪᓐᓇᕐᓂᖓᓂ ᐃᓱᒪᓕᐅᕆᑦᑎᐊᙱᓐᓂᐅᔪᒥᑦ, ᓲᕐᓗ ᐃᒥᐊᓗᒃᓯᒪᓗᓂ ᐊᖁᓐᓂᕐᒥᑦ ᐅᓇᑕᓕᕐᓂᕐᒥᓪᓘᓐᓃᑦ. ᐊᐱᕆᓗᑎᑦ ᖃᓄᖅ ᐃᓱᒪᒋᔭᖃᕐᓂᖏᓐᓂ ᐃᒥᐊᓗᒃ ᑭᓇᑐᐃᓐᓇᒥᒃ ᐊᐅᓚᑦᑎᓂᖃᕈᓐᓃᕈᓐᓇᕐᓂᖓᓂ.
- ᐅᓂᒃᑲᐅᑎᓗᒋᑦ ᒪᒃᑯᒃᑑᑉ ᖃᕋᓴᖓ ᐱᕙᓪᓕᐊᖏᓐᓇᕐᓂᖓᓂ ᑭᓯᐊᓂ 20−ᖏᓐᓃᓕᕈᓂ ᐊᒻᒪᓗ ᐃᒥᐊᓗᒃ ᐊᒃᑐᕐᓂᕐᓗᒃᑎᑦᑎᓂᐅᔪᓐᓇᕐᓂᖓᓂ ᐆᒥᖓ ᐱᕙᓪᓕᐊᓂᐅᔪᒥᑦ.
- ᐅᖃᐅᓯᖃᕐᓗᑎᑦ ᐅᔭᐅᕆᔭᐅᓯᒪᓚᐅᖅᓯᒪᒍᑎᒃ ᐱᖃᓐᓇᕆᔭᖏᓐᓂ ᐃᒥᐊᓗᖕᓂᕐᒧᑦ. ᑕᐃᒪᐃᓂᑰᒍᑎᒃ, ᖃᓄᖅ ᑭᐅᓚᐅᖅᐸᑦ ᐊᒻᒪᓗ ᖃᓄᐃᓕᐅᕈᓐᓇᖅᐸᑦ ᐊᔾᔨᒋᙱᑕᖓᓂ ᓯᕗᓂᒃᓴᒥ?
- ᐃᖅᑲᐃᑎᓪᓗᒋᑦ ᓱᕋᐃᒐᓗᐊᕈᑎᒃ ᒪᓕᒐᕐᓂᑦ ᐃᒥᐊᓗᖕᓂᕐᒧᑦ, ᐃᓕᖕᓄᑦ ᐅᖃᕈᓐᓇᖅᐳᑦ ᐃᑲᔪᖅᑕᐅᔪᒪᓗᑎᒃ ᖃᖓᑐᐃᓐᓇᑦᑎᐊᖅ. ᐃᖅᑲᐃᑎᓪᓗᒋᑦ ᐊᓯᖏᓐᓄᑦ ᐃᓱᒍᓐᓇᕆᕗᑦ ᓄᓇᓕᖕᓂ, ᐃᓚᖃᕐᓗᓂ ᐱᖃᓐᓇᕆᔭᖏᓐᓄᑦ, ᐃᓄᑐᖃᕐᓄᑦ, ᐃᓗᐊᖅᓴᐃᔨᒧᑦ ᐃᓱᒪᓕᕆᔨᒧᓪᓘᓐᓃᑦ.
ᐅᐸᒃᓯᒪᓂᖅ ᐃᓚᖐᓄᑦ ᓄᓇᓕᖕᓂᓪᓘᓐᓃᑦ ᖃᓄᐃᓐᓂᐅᔪᒥ ᐃᒥᐊᓗᒃᑕᖃᖅᑎᓪᓗᒍ
- ᐹᑎᖅᑎᒍᕕᑦ ᓂᕆᑎᑦᑎᒍᕕᓪᓘᓐᓃᑦ ᐃᓄᐃᑦ ᐃᒥᐊᓗᖕᓂᐊᖅᑎᓪᓗᒋᑦ, ᐅᖃᓪᓚᒡᓗᑎᑦ ᖃᓄᐃᓪᓗᐊᕐᓂᕐᓂ ᑭᓇᑐᐃᓐᓇᖅ ᐃᒥᐊᓗᓗᐊᕈᓂ. ᐅᖃᐅᓯᖃᕐᓗᑎᑦ ᖃᓄᖅ ᐸᖅᑭᔪᓐᓇᕐᒪᖔᖅᐱᑦ ᐱᖃᓐᓇᕆᔭᕐᓂᑦ ᐊᒻᒪᓗ ᐊᖏᕐᕋᑦᑎᐊᕐᕈᓐᓇᖅᑎᑦᑎᓂᕐᒧᑦ ᐊᑦᑕᓇᙱᑦᑐᒥ.
- ᖃᓄᐃᓕᐅᕐᓂᐅᔪᒦᒃᑯᕕᑦ ᓄᓇᓕᖕᓂ, ᐃᕝᕕᑦ ᕿᑐᙵᐃᓪᓘᓐᓃᑦ ᑕᑯᑐᐃᓐᓇᕆᐊᖃᖅᐳᑎᑦ ᑭᓇᑐᐃᓐᓇᒥᒃ ᐃᒥᐊᓗᓗᐊᖅᑐᒥ ᐊᒻᒪᓗ ᐊᕿᑦᑐᖓᓴᒃᑐᒥ, ᐅᓇᑕᕋᓱᒃᑐᒥ ᐊᐅᓚᑦᑎᓂᖃᙱᑦᑐᒥᓪᓘᓐᓃᑦ. ᐊᖏᕐᕋᕈᕕᑦ ᐃᓱᒪᒃᓴᖅᓯᐅᕆᑦ ᐅᖃᓪᓚᖃᑎᖃᕐᓂᕐᒥᑦ ᐅᑯᓇᓂ:
- ᖃᓄᖅ ᐃᒃᐱᖑᓱᓚᐅᕐᓂᖏᓐᓂ ᐃᓱᒪᒋᔭᒥᓂᓪᓗ ᑕᑯᓂᕐᒥ ᑭᓇᑐᐃᓐᓇᒥᒃ ᐋᖓᔮᕐᔪᐊᖅᑐᒥ.
- ᐅᓂᒃᑲᐅᑎᓗᒍ ᐊᒥᐊᓗᓗᐊᖃᑦᑕᕐᓂᖅ ᐊᒃᑐᐃᓲᖑᕗᖅ ᐃᓄᑐᐃᓐᓇᐅᙱᑦᑐᒥ ᑭᓯᐊᓂ ᑭᒃᑯᓕᒫᓂᒃ ᓄᓇᓕᖕᓂ.
- ᐃᓱᒫᓘᑎᒋᔭᐃᑦ ᖃᓄᐃᙱᑦᑎᐊᖁᔨᓂᕐᒧᑦ ᐆᒧᖓ ᐃᓄᖕᒧᑦ ᐊᒻᒪᓗ ᓂᕆᐅᖕᓃᑦ ᐃᑲᔪᖅᑕᐅᓂᐊᕐᓂᖓᓂ ᐱᓕᕆᓂᕐᒧᑦ ᐃᒥᐊᓗᖃᑦᑕᕐᓂᕐᒧᑦ ᐊᑲᐅᙱᓕᐅᕈᑕᐅᔪᓐᓇᖅᑐᒧᑦ. ᐅᓂᒃᑲᐅᑎᓗᒍ ᐃᓛᓐᓂᒃᑯᑦ ᐃᓄᐃᑦ ᐃᒥᐊᓗᖕᒥ ᐊᑐᖅᐸᖕᓂᖏᓐᓂ ᐊᒃᓱᕈᕈᑎᖃᕐᓂᕐᒧᑦ ᑲᒪᓇᓱᐊᕐᓂᕐᒧᑦ, ᐋᓐᓂᐊᕐᓂᕐᒧᑦ ᐊᓯᖏᓐᓂᓪᓗ ᐃᓅᓯᐅᑉ ᐊᒃᓱᕈᕐᓇᖅᑐᖏᓐᓄᑦ.
- ᑕᑯᓯᒪᖕᒪᖔᑕ ᐱᖃᓐᓇᕆᔭᒥᓂᑦ ᐋᖓᔮᖅᑐᓂ ᐃᒻᒥᖕᓂᓪᓘᓐᓃᑦ ᐋᖓᔮᖅᓯᒪᒍᑎᒃ ᖃᖓᑐᐃᓐᓇᖅ? ᐄᖑᒍᓂ, ᖃᓄᖅ ᐃᒃᐱᖕᓂᐊᓂᖃᓚᐅᖅᐸᑦ? ᐅᖃᐅᓯᖃᕐᓗᑎᒃ ᐸᕐᓇᒍᑎᒃᓴᓂᒃ ᐊᑦᑕᓇᔾᔭᐃᖅᓯᒪᓂᕐᒧᑦ ᐃᒻᒥᖕᓂᑦ, ᐊᓯᖏᓐᓂᓪᓘᓐᓃᑦ ᐃᒥᐊᓗᖕᓂᐊᕈᑎᒃ ᓯᕗᓂᒃᓴᒥᑦ.
- ᑕᒪᓐᓇ ᐱᕕᒃᓴᑦᑎᐊᕙᐅᕗᖅ ᐅᖃᐅᓯᖃᕐᓂᕐᒥᑦ ᖃᓄᖅ ᐃᒥᐊᓗᒃ ᐱᔭᕆᐊᑐᙱᓚᖅ ᐊᓕᐊᓇᐃᒍᓱᖕᓂᕐᒧᑦ.
ᐃᓕᑦᑎᓂᕐᒥ ᓄᓇᓕᖕᒥᐅᑕᒥᒃ ᐃᖅᑲᖅᑐᒐᒃᓴᐅᓕᕐᓂᖓᓂ ᐃᒥᐊᓗᖕᒧᑦ−ᐱᑎᑕᐅᔪᒥ ᖃᓄᐃᓐᓂᐅᔪᒧᑦ
- ᐃᓅᓱᒃᑐᑦ ᐃᒥᐊᓗᒐᔪᖕᓂᖅᓴᐅᕗᑦ ᐅᓗᕆᐊᓇᕐᓂᐅᔪᓂ ᐃᓱᒪᒋᔭᖃᕐᓇᑎᒃ ᖃᓄᐃᓐᓂᐅᓂᐊᖅᑐᓄᑦ. ᑕᐃᒫᒃ ᐱᒻᒪᕆᐅᕗᖅ ᐃᖅᑲᐃᑎᓪᓗᒋᑦ ᐱᑕᖃᑐᐃᓐᓇᕆᐊᖃᕐᓂᖓᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᑲᑉᐱᐊᓵᕆᓇᓱᐊᓗᙱᓪᓗᒋᑦ. ᐅᖃᐅᓯᖃᕐᓗᑎᑦ ᐃᓚᖏᓐᓂ ᐃᕐᙲᓐᓇᑲᐅᑎᒥ ᑎᒥᒧᑦ ᐊᒃᑐᐃᓂᐅᔪᓂᑦ ᐃᒥᐊᓗᓗᐊᖃᑦᑕᕐᓂᕐᒧᑦ, ᓲᕐᓗ:
- ᐊᐅᓚᑦᑎᓂᖃᕈᓐᓃᕐᓂᕐᒧᑦ
- ᖃᐅᔨᒪᔪᓐᓃᕐᓂᕐᒧᑦ
- ᐳᐃᒍᕐᓂᖅ ᖃᓄᐃᓚᐅᖅᑐᒥ
- ᒥᕆᐊᖅᓴᕐᓗᓂ
- ᐃᒥᐊᓗᖕᒧᑦ ᑐᖁᓐᓇᖅᑐᖃᕐᓂᖅ
- ᐸᓖᓯᒃᑯᓐᓄᑦ ᐊᑲᐅᙱᓕᐅᕈᑎᓕᐅᕐᓂᖅ
- ᐱᕋᔭᖅᑕᐅᓗᓂ ᐋᓐᓂᖅᓯᕆᓂᕐᒧᑦ ᐱᕋᔭᖕᓂᐅᔪᒧᑦ
- ᐅᖃᐅᓯᖃᕐᓗᑎᑦ ᐅᓗᕆᐊᓇᕐᓂᐅᔪᓂᑦ ᐃᒥᐊᓗᖕᓂᕐᒥᑦ ᐊᒻᒪ ᐊᖁᓐᓂᕐᒧᑦ ᓄᓇᓯᐅᑎᓂᑦ, ᖃᒧᑕᐅᔭᓂᑦ, ᑎᓴᒪᓕᖕᓂ ᐅᒥᐊᕐᓂᓪᓘᓐᓃᑦ, ᐊᒻᒪᓗᑦᑕᐅᖅ ᐅᓗᕆᐊᓇᕐᓂᐅᔪᓂᑦ ᐃᑭᒪᖃᑎᕐᓂᖅ ᐊᓯᖏᓐᓂ ᐃᒥᐊᓗᒃᓯᒪᔪᓂᑦ.
- ᐅᖃᐅᓯᖃᕐᓗᑎᑦ ᖃᓄᖅ ᐃᒥᐊᓗᒃ ᐃᓛᓐᓂᒃᑯᑦ ᐃᓄᖕᓂ ᐃᓱᒪᓕᐅᑦᑎᐊᕆᙱᓐᓂᖃᕈᓐᓇᕐᓂᖓᓂ ᐊᒻᒪᓗ ᖃᓄᐃᓕᐅᖅᑎᑦᑎᔪᓐᓇᖅᐳᖅ ᖃᓄᐃᓕᐅᕋᔭᙱᑕᒥᓂᑦ. ᐅᖃᐅᓯᖃᕐᓗᑎᑦ ᖃᓄᖅ ᐃᒥᐊᓗᕐᔪᐊᖃᑦᑕᕐᓂᖅ ᐊᖏᒡᓕᒋᐊᖅᑎᑦᑎᔪᓐᓇᕐᓂᖓᓂᐅᓗᕆᐊᓇᕐᓂᖓᓂ ᐅᓇᑕᖃᑕᐅᓂᕐᒧᑦ, ᐊᑐᕐᓂᖃᕐᓗᓂᓗ ᐋᓐᓂᖅᓯᕆᔭᐅᓗᓂ ᐊᒻᒪᓗ ᐊᖏᙱᑦᑐᒧᑦ ᑯᔭᒃᑕᐅᓂᕐᒥᑦ.
- ᐊᔭᐅᕆᓗᒋᑦ ᐱᖃᓐᓇᕆᔭᒥᓂᑦ ᑲᒪᑦᑎᐊᕐᓂᕐᒧᑦ ᐃᒥᐊᓗᒃᑐᓂ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ ᐱᓕᕆᓂᐅᔪᓂᑦ, ᐃᒻᒥᖕᓂᒃ ᐃᒥᙱᒃᑲᓗᐊᖅᐸᑕ. ᓲᕐᓗ, ᐱᖃᓐᓇᕆᔭᒥ ᓄᖅᑲᖅᑎᑦᑎᓗᑎᑦ ᐊᖁᓐᓂᕐᒧᑦ ᐃᒥᐊᓗᒃᓯᒪᒍᑎᒃ. ᑕᒪᓐᓇ ᑕᑯᒃᓴᐅᑎᑦᑎᕗᖅ ᐱᔨᑦᓯᕐᓂᕐᒥᑦ − ᐃᓄᐃᑦ ᐃᓅᖃᑎᒌᖕᓂᐅᔪᒥ ᐱᓐᓇᕆᔭᐅᔪᖅ ᐱᔨᑦᑎᕋᕐᓂᕐᒧᑦ ᐊᒻᒪᓗ ᑐᓂᓯᓂᕐᒥ ᐃᓚᒌᓄᑦ ᐊᒻᒪᓗ ᓄᓇᓕᖕᓄᑦ. ᑕᑯᒃᓴᐅᑎᑦᑎᕗᖅ ᐱᔭᕆᐊᖃᕐᓂᐅᔪᒥ ᐃᒃᐱᒍᓱᑦᑎᐊᕐᓂᐅᔪᒥ ᐊᒻᒪᓗ ᐱᓕᕿᓂᖃᕐᓗᓂ ᓴᐳᔾᔨᓯᒪᓂᕐᒧᑦ ᐊᓯᖏᓐᓂ ᓄᓇᓕᖕᓂ ᐋᓐᓂᕈᓐᓇᖅᑐᓂ ᐱᕐᕈᓗᐊᕿᓂᐅᔪᒥ ᐱᑎᑕᐅᔪᒥ ᐊᖁᑎᐅᔪᒥ ᐃᒥᐊᓗᒃᓯᒪᔪᒥᑦ.
- ᐅᖃᐅᓯᖃᕐᓗᑎᑦ ᖃᓄᖅ ᐊᑦᑕᓇᙱᓐᓂᖅᓴᓂ ᓂᕈᐊᒐᒃᓴᓕᐅᕐᓂᐅᒥᑦ ᐃᒥᐊᓘᑉ ᒥᒃᓵᓄᑦ ᒥᒃᖠᒋᐊᖅᑎᑦᑎᓂᕐᒧᑦ ᐊᒃᑐᕐᓂᕐᓗᒃᑎᑦᑎᓂᐅᔪᒥᒃ. ᐅᖃᐅᓯᖃᕐᓗᑎᑦ ᖃᓄᑎᒋ ᐃᒥᐊᓗᒃ ᐃᓱᒪᒋᔭᐅᓂᖓᓂ ᐊᑦᑎᒃᑐᒥ−ᐅᓗᕆᐊᓇᕐᓂᖓᓂ ᐊᒻᒪᓗ ᖃᓄᖅ ᐊᑦᑕᓇᔾᔭᐃᖅᓯᒪᔪᓐᓇᕐᓂᖏᓐᓂ ᐃᒥᐊᓗᒃᑯᑎᒃ.